Anwar tinanud di Hajiji pinopowonsoi ababayan mamabak tana’ Wokok Hidroelektrik Ulu Padas id Tenom di tadau baino’.
TENOM: Projik Hidroelektrik Ulu Padas kopongimbulai ginoris lotirik soginumu’ 187.5 megawatt (MW) potilombus dino kouhup kumaa grid pangaba’ ginoris Sabah miampai kopomoruhangan soginumu’ 15 pihatus.
Boyoon Montiri (KM), Datuk Seri Haji Hajiji Haji Noor minoboros, projik diti okon nopo ko’ monoribau’ kobolingkahangan pangaba’ lotirik id Sabah nga nogi’ wookon inggisaman panalasaian timpu anaru di po’ompus kumaa pogun diti.
Ka disio, sabaagi mongunguhup oponsol kumaa piomungan ginoris oinwoguan, wokok Hidroelektrik Ulu Padas pikikiro kopomogonop kinoinsawaton ginoris lotirik Sabah soira’ do opongo ilo’.
“Iti okon nop oko’ koponumboyo’ kinoingkawason kopokionuan ginoris tokou nga nogi’ kritikal montok Koburuon Tumau om Gas Sabah om Taman Pomorunan Kota Kinabalu, potilombus dino koponginsikap kosunion ikonomi id pogun tokou.
“Suai ko ilo’, iso’ ponorisidan nga’ masaan poindalanon mooi do wokok diti kikosiwatan montok mangaba’ koluyungon waig oborisi’ om aadang kumaa moomoguno gisom 6,000 riong liter sangadau (JLH),” ka disio id Ramai Mamabak Tana’ Wokok Hidroelektrik Ulu Padas id Kampung Kungkular, doros hiti id konihab.
Hajiji miampai di Anwar om tombului suai guminambar id kinoiyonon ababayan mamabak tana’ Wokok Hidroelektrik Ulu Padas id Tenom di tadau baino’.
Luguan Montiri, Datuk Seri Anwar Ibrahim pinopoindalan ababayan mamabak tana’ projik dilo’.
Hajiji minoboros, projik Wokok Hidroelektrik Ulu Padas nopo nga’ kinomogoton oponsol id koburuon kogogonopan om mamajamin kojominon ginaras lotirik montok mogigiyon Sabah.
“Iti nga’ iso’ nogi’ laang kumaa mongingkawas naangayan koposion rayat om kosodiaan tokou montok poposiau sabah kumaa timpu komogoton wagu.
“Projik diti kapanahak waya’ linabai osonong kumaa ikonomi nokoiyonon mantad sunduk kosiwatan pakarajaan, koingkawason nindopuan mogigiyon om mongindapu’,” ka disio.
Ka disio, miampai momoguno kosiwatan hidro pogun di poinharo mantad, projik Hidroelektrik Ulu Pasas pikikiro koposiau kosimbanon om kosili ponokodung kumaa kosimbanon di lobi kagayo kumaa pogun Sabah.
“Siktor ginaras nopo nga’ poposiau oponsol om wookon mongunguhup agayo kumaa ikonoim Sabah pointonod pipiro nohopod toun nakatalib,” ka disio.
Minoboros isio, koporintaan pogun toririmo pointopot montok tumilombus papagaras koponguludan intodonon ginaras id Sabah miampai pinopoimpuun Palan Induk om Hontolon Ginoris Sabah 2040 (SE-RAMP 2024) di wulan Kosiam katatalib.
Tumanud disio, ababayan mamabak tana’ projik dilo’ nopo nga’ tana’ pikogosan pisokodungan osonong kotinanan koporintaan om swasta. Bohogian popoburu’ projik, Upper Padas Power Sdn. Bhd, nopo nga’ mantad pikogosan pisokodungan miampai koporintaan pogun maya’ Sabah Energy Corporation Sdn. Bhd om siktor swasta ilo’ nopo nga’ Gamuda Berhad om Kerjaya Kagum Hitech JV Sdn. Bhd.
“Kinorikotan di Luguan Montiri montok pinopowonsoi ababayan mamabak tana’ Wokok Hidroelektrik Ulu Padas, atalang kopokito sokodung koporintaan Pisompuruan kumaa pogun Sabah, id inggisaman popobuur’ kogogonopan montok koundaran rayat id pogun diti,” ka disio.
