Hajiji miampai tongo’ kumoduo disio Datuk Seri Dr. Jeffrey Kitingan (koduo, wanan), Datuk Seri Dr. Joachim Gunsalam (kotolu, wanan), Datuk Ir. Shahelmey Yahya (koduo, gibang) om i Montiri Kousinan, Datuk sEri Masidi Manjun (gibang) id pitimungan Lintuhun Undangan Pogun (DUN) Sabah di tadau baino’.
KOTA KINABALU: Malaysia om Indonesia pointotopot montok manalasai piwolitan tindal om piwolitan rahat watas miampai poinpuli om gisom noondo diti aiso’ po nunu-nunu piniokunan winonsoi maya’ tongo’ mitingan misulak (bilateral meeting) i kapaampai do Pulou Sebatik om Rahat Sulawesi.
Boyoon Montiri (KM), Datuk Seri Haji Hajiji Haji Noor minoboros, Koporintaan Pogun nga’ pinohompit nogi’ miampai aparagat id mitingan misulak diti i binuruan do Komontirian Labus Pogun om papatantu’ tikid pibabarasan toi agag ngaawi’ i kapaamapi piwolitan Sabah, Malaysia om Indonesia nopo nga’ pawaladon om posukuon kumaa Nuludan Montiri Sabah lobi pogulu montok maganu poimpahan pibabarasan, rikoton om katatapan.
“Koporintaan Pogun Sabah potimporon di ningkakaton atalang, pointatap om amu’ sumimban mantad nunu nopo pongumbalan pogun sombol montok papatantu’ piwolitan pogun kosuul no pogun Sabah toririmo ogompi’ om amu’ oinggangahan.
“Koporintaan Pogun kumodou di ningkakaton do piwolitan pogun Sabah id Pulou Sebatik nopo nga’ buris piwolitan poinaru kininaru 4°10’ mimpuun mantad East Pillar gisom Low Water Line doid ponong kosilahon Pulou Sebatik.
“Piwolitan Maritim i sinoinan maya’ Triti Rahat Sulawesi i nokopohompit nod o 12 watu nautika, amu’ koponinong korugion kumaa Sabah,” ka disio kumaa di Datuk Seri Mohd. Shafie Hj. Apdal (Senallang) i minokianu kopointalangan karait di pibabarasan miampai Indonesia kopohompit Pulou Sebatik id siriba’ Pibatosan Rahat Sulawesi, i sugaton do Indonesia om nung pibatosan nowonsoi no toi kakal id nayatan pibabarasan ontok pitimungan Lintuhun Undangan Pogun (DUN) di tadau baino’.
Boyoon Montiri minoboros, pibabarasan kopotontuan piwolitan maritim montok koiyonon i katalib 12 wagu nautika gisom 200 watu nautika id Rahat Sulawesi (id koiyonon ND6 om ND7) i po nogi’ ‘Exclusive Economic Zone’ (EZZ) kakal amu’ po notimpuunan.
Ka disio, piwolitan i kapaampai Pulou Sebatik ilo’ nopo nga’ watas “intertidal” kakal id pibabarasan. Pibabarasan kaawagu maya’ Mitingan Puruankuasa’ Teknikal Pinotomod (Special Technical Meeting – STM) i pinapanau di ko 16 gisom 17tw Kohopod om Iso’ 2023 id Tangerang, Indonesia pinupusan miampai aiso’ nunu-nunu kinoburuon sabab goduduo bohogian poinggirot di di ningkakaton sopipoopori.
“Pibabarasan dilo’ binuruan di Luguan Potunud, Koupisan Hal Maritim, Komontirian Labus Pogun. Naamot, Koporintaan Pogun nobian di Tapantang Monunurat Koporintaan Pogun, Luyar Agayo Pogun, Monunurat Hal Suang Pogun om Ponolidikan om Potunud Tana’ om Monunukat id tinonudan Malaysia doid mitingan dilo’,” ka disio.
