Flovia pinapatahak tandamato kuminaa Mononomboros naalap, Datuk Dr. Tengku Naufal Tengku Mansor.
KOTA KINABALU: Soginumu’ 362 kes koponinduolan kolominan nokoruput id Sabah po’ompus timpu wulan Koiso’ gisom Kohopod toun diti.
Montiri Koburuon Mogigiyon om Kasasanangan Rayat, Datuk James Ratib minoboros pinongintoban Koupisan Ponoriukan Kopomusalaan (D11), Longkod Upis Pulis Kontinjen Sabah nokopokito kinoinsawaton nung piadangon di 301 no kes nokoruput di toun nakatalib.
“Iti kopotongob kopio sasabab no do waya’ koponinduolan kumaa nogompitan awagat i potuu id sunduk tinan toi tutok diolo’.
“Inggisaman manangod koponinduolan diti nga’ okon ko’ amu’ komilo onuon nga’ momoguno kogompitan om kopurimanan tinonggungan mantad koinsanai mogigiyon Sabah.
“Mantad dilo’, bohogian poinggompit lolobi no Koupisan Hal Koonduan Sabah (JHEWA) kiguno popoindalan lobi kogumu’ ababayan kopurimanan montok manahak kopoilaan kumaa mogigiyon karait do hal koponinduolan kumaa koonduan,” ka disio minoboros pinopoimagon Ababayan Kopihondot Tadau Monoibau Koponinduolan Kumaa Koonduan “Sleeping with The Enemy: Koponinduolan Kumaa Koonduan” do hiti di tadau Kotolu.
Teks boboroson disio binasa’ di Monguhup Montiri Koburuon Mogigiyon om Kasasanangan Rayat, Datuk Flovia Ng.
Ka di James, montok papatantu’ ababayan moningkod koponinduolan kumaa koonduan aanu popoindalan miampai kiwaya’ om poingongkop, Komontirian Koburuon Mogigiyon om Kasasanangan Rayat (KPMKR) maya’ JHEWA papapanau nogi’ do kimpin ‘We Eliminate Violence Againts Women (WeVAW)”.
“WeVAW pinosuang doid ababayan ‘Flagship Outreach Santuni Wanita’ om papanahon id 73 watas Lintuhun Undangan Pogun (DUN) Sabah monotk timpu toun 2021 gisom 2025 id siriba’ Palan Sabah Maju Jaya (SMJ),” ka disio.
Kalansanan po nogi’ di James o JHEWA, tumilombus minggisom mamagampot rikoton dilo’ om pointatap sundung pia do opupusan o ababayan flagship dilo’.
Ababayan sokodung sosial “Sleeping with The Enemy: Koponinduolan Kumaa Koonduan” pinaharo kopihondot do “International Day for the Elimination of Violence Against Women” i ramaion do ko 25tw Kohopod om Iso’ tikid toun.
Nokotindapou nogi’, Monunurat Pointatap KPMKR, Maria Chong om Potunud JHEWA, Haslina Ismail.
Kapt:
