Hajiji pinapatahak watikah kinoposilihan Felo Kehormat IDS Sabah kuminaa Timbang Canselor Univositi Malaysia Sabah (UMS), Prof. Datuk Dr. Kasim Haji Mansor.
KOTA KINABALU: Institut Ponorisidan Kopoburuan (IDS) Sabah kiguno tumilombus sumili tinan ponolidikan om momumusorou montok mogowit koburuon kumaa mogigiyon om pogun diti.
Boyoon Montiri, Datuk Seri Hajiji Haji Noor minoboros, Koporintaan Pogun tumilombus monokodung inggisaman i winonsoi do IDS kaampai no toririmo poposili IDS sabaagi tinan susukuon nogi’ puralan di poinbida’.
“Pamanahan montok papatantu’ Sabah ototopot koburu’ montok toinsanan mogigiyon id pogun diti nopo nga’ iso’ tonggungan tokou toinsanan. Toririmo ku manahak pomodulianan kumaa tikid asil om i naanu mantad pinonorisidan mantad IDS, potilombus dino kapanahak koundaran miampai poinpuli kumaa mogigiyon pogun diti.
“Agayo kalansanan ku mooi do IDS okon nopo ko’ sabaagi tinan momumusorou montok kopoburuan ikonomi nga nogi’ sabaagi tinan momumusoroum ontok goduduomogigiyon om pgoun, ilo’ nopo nga’ rolou popiromut lansanon om mogigiyon montok koundaran pogun,” ka disio id Ramai Pongunsikohan om Sodop Gala kopihondot Kinouliton Toun Ko-38 IDS Sabah, id Longkod Konvensyen Sompomogunan (SICC) do hiti, di songkosodop.
Hajiji minamaramit Pinonorisidan Palan Strategik Kopoburuan Ikonomi Watas Tuaran 2024-2035 mantad di Upisor Watas Tuaran, Hadzlan Haji Jablee.
Boyoon Montiri lumansan nogi’ sitaf IDS tumilombus popoindalan tonggungan miampai poinponu’ tinonggungan om amu’ obinronok sunduan kosuul no soira’ popoindalan ponolidikan i kapanahak koundaran kumaa pogun diti.
“Sabaagi ponolidik monimpuun, IDS miampai koinsanai dilo’ mongigit angkab om kalansanan Sabah. Miampai inggisaman di onuon, kaanu tokou mamagampot rontob momumusorou bobos akawas om kotumbayaan di gunoon montok monumboyo’ otnggungan sabaagi popopoindalan om kapagaras.
“Id inggisaman Koporintaan Pogun mogowit lobi kogumu’ koburuon kaampai mangangapu’ kumaa Sabah, tonggungan IDS otopot nopo nga’ oponsol kopio,” ka disio.
Hajiji monongkirumo miampai wookon puru IDS di nokorikot.
Hajiji minoboros, ginoris IDS montok tumanud di kinoburuon maso-maso, ki’inovasi miampai pointatap om monginsonong pomusarahan di poinharo mantad nopo nga’ kokitanan do tonggungan di poinggompi’ pointonod tadau kumoiso’ kotinanan dilo’ do tinuridong.
“Kohondot dilo’, orohian oku manangkabayahan kumaa IDS tu’ nakalantoi pinopoindalan Ramai Pongunsikohan om Sodop Gala kopihondot Kouliton Toun Ko-38 diti. Otopot nopo, tinonggunan diti nokoowit kuminaa kinoponuridongan koyuyuon Sabah om minonuridong nuludan momumuruan i kiharo kogoosan di agaras.
“Ounsikou oku nokopisokodung miampai pipiro montiri, mobi’ rayat, om nogi’ ponolidik i nokoimbulai mantad IDS. Oinsanan tokou kiharo goos ginaras di akawas mantad no do nawawaya’an om kinapabantaan di maso poinsurupu karaja’ id kotinanan diti,” ka disio.
Kalansanan nogi’ disio oinsanan puru IDS toririmo posodia’ montok sumili sakag tumungkus momonsoi katatapan om momumuruan montok monoibau kaantaban maso-maso om timpu dumontol, tumanud gatang ponolidikan om ponginsomokan mimpau kointalangan montok koburuon.
“Pointonod kolimpuunon minogowit oku mandat sabaagi Boyoon Montiri, nokito ku toluod di amu’ agatang i pinatahak do IDS kumaa Koporintaan Pogun. Ponolidikan di naanu miampai osorisid pomusarahan om pinogintongan di po’ompus nokoponumboyo’ kopikikiraan akawas i pokimamahaan mantad songinan tinan momumusorou.
“Tinopot do IDS id kinapamansaian Palan Karaja’ Kopoburuan Modal Insan, Pamalanan Watas, ponorisidan piwolitan miampai Kalimantan, nogi’ kopogompitan miampai mongingigit tonggungan nopo nga’ laang i koponokodung angkab Hontolon Sabah Maju Jaya.
“Inggisaman diti sinokodung di tonggungan IDS montok mongingkawas kogorisan nayatan guas. Mogigiyon id siriba’ nakaramit rontob pisokodungan, kaadangon, om kotoronongon i amu’ po insan kaantakai pogulu diti sompipi’ tiso’ om tiso’. Osudu’ oku kokito tingkananon IDS montok papatantu’ kopoburuan di aadas id poliliput Sabah,” ka disio.
