Hajiji pinopotungu ais otuu ponokotanda’ pisokodungan Koporintaan Sabah om Huawei.
KOTA KINABALU: Koporintaan Sabah pinopikogos Memorandum Pihunungan (MoU) miampai Huawei Technologies Malaysia Sdn. Bhd. montok poposikap inggisaman kosimbanon digital id Sabah.
Suminasi’ ababayan suminain pibatosan dilo’ id longkod upis Huawei doid Shenzhen, China, i Boyoon Montiri, Datuk Seri Hajiji Haji Noor minoboros, piilangan nopo diti nga’ iso’ kinosindakon oponsol kumaa timpu dumontol digital id Sabah.
“Piilangan miampai Huawei Technologies diti kapagaras do pogun tokou om mogigiyon dau montok maganu koundaran ‘inovasi’ tiknologi, kopoluhub kosunion ikonomi om surupukaraja’ koporintaan di lobi kosonong.
“Ounsikou oku montok popoilo do id siriba’ MoU diti, Huawei Technologies poposodia’ surupukaraja’ pirundingan om ponontudukan id kaganaan pomutanaman, pamansaian ‘pintar’ id siriba’ Pomorunan 4.0, ponombuluyan, pamalanan kakadayan pintar, e-dagan, kogogonopan digital, kopogisolioputan ‘inklusif’ om koporintaan digital.
“Iti kouhup kopio id koponigampotan angkab dahai montok popodigital Koporintaan Sabah,” ka disio.
Hajiji suminasi’ suminain MoU id pialatan di Zainuddin (poindikau koduo, gibang) minongobi’ Koporintaan Sabah om i Sun (poindikau koduo, wanan).
Buruan Upisor Eksekutif Huawei Malaysia, Simon Sun minoboros: “Mamaso Sabah monilombus visi dau montok ikonomi digital di mumang buru’, Huawei posodia’ montok monokodung dilo’ id koponuridongan songinan pogun di ‘pintar’, ‘inovatif’ maya’ digital om po’ompus.”
Suai ko ilo’, id siriba’ MoU diti, Huawei Technologies mongukab inggisaman pisokodungan montok monimpuun kopoindalanan surupukaraja’ digital di poinharo AI om tumanud kointalangan montok koporintaan, pongindopuan om mogigiyon.
Suminain MoU minobi’ Koporintaan Sabah nopo nga’ i Luguan Potunud Surupukaraja’ Koporintaan Pogun, Datuk Zainuddin Aman, naamot di Simon Sun, suminain id koobian do Huawei.
Nokotindapou nogi’ i Montiri Koburuon Pomorunan om Mongindapu’ Sabah, Datuk Phoong Jin Zhe; Monunurat Koporintaan Pogun, Datuk Seri Sr. Safar Untong; Potunud Lembaga Huawei om Presiden Huawei Digital Power, Hou Jinlong om Presiden Sektor Koporintaan Global Huawei, Xia Zun.
Pogulu ababayan suminain pibatosan dilo’, i Boyoon Montiri nowit nogi’ tuminombului do Huawei Technologies karait kopoindalanan kakadayan pintar, balajaran pintar doid Lintuhun Pokikitanan Von Neumann Pongindopuan Huawei Enterprise.
