Dr. Joachim (kotolu, gibang) pinapatahak replika cek kuminaa nakalantoi PBT Lestari 2023 i nalantoi do Kounsol Watas Beaufort om sinasi’ di Dr. Jamili (koduo, wanan).
KOTA KINABALU: Komontirian Koporintaan Koiyonon om Pomuwalaian (KKTP) tumilombus tumopot id kosokodungan inggisaman mongingkuri’ waya’ kosimbanon iklim (tawan) i nootilombus tingkananon do Koporintaan Pogun Sabah.
Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam minoboros, iti kopongoi di tonggungan pinoboros di Boyoon Montiri Datuk Seri Hajiji Haji Noor id boboroson disio doid Pitimungan Sompomogunan Kosimbanon Iklim Sabah 2021.
“Id siriba’ Pibatosan Paris, Malaysia sondiri’ kitonggungan montok mongingkuri’ kopoiduan gas walai otomou soginumu’ 45 pihatus dumontol 2030.
“Mantad dilo’, laang ngaawi’ kiguno onuon sabaagi sokodung kumaa prinsip ‘Konvensyen Rangka Kerja Perubahan Iklim Pertubuhan Bangsa-Bangsa Bersatu (UNFCC)’ om nogi’ Tuduan Kopoburuan Lestari (SDG) id siriba’ Kotinanan Tinaru-Tinaru Misompuru,” ka disio ontok pinopoimagon Seminar Lanskap 2023 ki’uhu “Regreeneration: Living, learning and Growing Together” id Longkod Konvensyen Sompomogunan Sabah (SICC) do hiti di tadau baino’.
Karait kokomoi seminar diti, Dr. Joachim minoboros, komoyon do Regreeneration okon i ko’ karait nopo do mananom kayu toi mongimbulai koiyonon otomou, miampai pinopointlaang do ilo’ nopo nga’ ponginsomokan po’ompus i kopuli do ‘living’ toi nubasanan koposion; ‘learning’ ilo’ nopo nga’ komilaan minsingilo toi sumudong kumaa pososorili’ om ‘growing together’ ilo’ nopo nga’ posuni nubasanna toinsnana mooi do koinggayo sabaagi iso’ mogigiyon ‘lestari’.
“Mantad dilo’, pokionuon ku tikid mantad dati’ do maganu tonggungan montok tumonggoi manamong kolidasan om kasasanangan lanskap pososorili’ dati’,” ka disio.
Dr. Joachim (tanga’) ruminamit tandamato mantad di Dr. Jamili.
Tumanud disio, seminar diti tadau baino’ nopo nga’ sabaagi iso’ impohon i koposompuru di tongo’ momomonsoi katatapan oponsol katatapan om momomonsoi kosimbanon om momogompi’ biodiversiti pososorili’ tokou tumanud tonggungan kaganaan toi kotinanan sompoopori.
“Kohondot dilo’, Seminar Lanskap 2023 kohunung kopio do uhu di nowit dau.
“Nubasanan popoingubas kogogonopan otomou id tikid komponen kopoburuan poinginan kopongimbulai pososorili’ di lobi olidas om lobi kosudong montok koiyonon tokou kumaraja’ toi walai montok iyon-iyonon.
“Elemen otomou diti kopouyu ogumu’ koundaran, mimpuun mantad mongingkawas sinonong tongus gisom mongunsub kasasanangan tinan om tutok. Kolidasan tutok nopo iso’ tanda’ di adalaan doid nayatan mogigiyon noondo,” ka disio kawagu.
Dr. Joachim minoboros, asil Pinogintongan Kabansaan Kolidasan om Morbiditi (NHMS) nokopokito Sabah nokopsourat pihotusan bobos akawas id Malaysia montok mogigiyon i nokotoguang kobolingkahangan kolidasan tutok, naamot tomporurul tundundu’ potilombus nosili kinapataion ogumu’ id pomogunon diti.
Mantad no dilo’, inggisaman montok mongimbulai pososorili’ id lobi kapasanang oponsol kopio okon nopo ko’ id suang walai, ka disio kawagu.
“Inggisaman popotomou diti kiguno timpuunan bobos kosopung ontok id nayatan konsep pamalanan pogulu kopolulusan Nayatan Kopolulusan Palan Kopoburuan. Id nayatan diti tonggungan abaal toi kitoilaan id seni wonsoi lanskap (Lanscape Architecture) kiguno onuon mooi do koponingkanan kumaa pomowonsoi pososorili’ labus (External Spaces), ponuridongan dilo’, nogi’ karaja’ ngaawi’ poinggompit monotk papatnatu’ karaja’ ngaawi’ dilo’ nopo nga’ kopisudong di tonggungan om kogunoon (Function & Use) toisoiso’ koiyonon.
“Maya’ pomogunaan elemen otomou, om iri nogi’ do koposodiaan Palan Lanskap kosili iso’ i lobi kosudong kumaa kolidasan pososorili’ moomoguno om okon ko’ intangan nopo sabaagi’ ‘planting plan’ toi pananaman nopo do kayu.
“Lanskap okon ko’ mananom no do kayu. Otomou di komoyon do hiti okon ko’ montok nodi kopongimbulaian koiyonon otomou toi taman, nga’ elemen poinginan di suai miagal do taman id timpak taap, sistem pongonuan waig rasam, pomogunaan kogogonopan pamawaal di osuau sandad om kopomogunaan ginoris aanu monginwagu maya’ sistem kopulokison ginoris solar.
“Waya’ do laang ngaawi’ diti kiguno kopitanud di pomusarahan tokou. Nung pomusarahan tokou kakal karalano’ laid, koposodiaan nunu-nunu i noroitan di tiinu’ aiso’ kotutukon. Momonsoi katatapan id karatas nopo. Aiso’ ‘sense of belonging’, inggisaman montok posuni mogigiyon lestari amu’ kalantoi.
“Mantad no dilo’, inggisaman posuni kopurimanan maya’ mogisusuai ababayan ponudukan, inggisaman kopogompitan mogigiyon, kimpin om ogumu’ po ralan di si kaanu popokito koponsolon pososorili’, gatang biodiversiti om koponguludan tana’ di po’ompus,” ka disio, i minokianu tikid kotinanan do papaanjur nubasanan dau sondiri’.
“Regreeneration nopo nga’ karait monuridong kinoulunan tokou sabaagi rayat pogun diti, sinakagon i mongupus pososorili’ tokou, sinakagon i mongupus pomogunan tokou. Pogun tokou, yati’ sondiri’ no i manamong kotilombuson dilo’, nung okon isai podi?
Dr Joachim (poindikau, tanga’), Dr. Jamili (poindikau, koduo gibang) guminambar pongingitanan miampai oinsanan i nokotindapou doid Ababayan Kinopoimaganan Pomupusan Seminar Lanskap 2023 dilo’.
Minoboros isio, koporintaan tumilombus tumopot monuridong ‘koponguludan kopoburuan kumaa mogigiyon kiginoris iyonon’.
“Oponsol montok dati’ mamarait di kopoindalanan koporintaan om kopoingubasanan mogigiyon Otomou i koponguhup mongimbulai pososorili’ koiyonon tooku mongingiyon lobi kapasanang. Ilo’ miagla di pinalan id Kopotundaan Lestari (Sustainable Development), Palan Kopoburuan Sabah Maju Jaya, Katatapan Lanskap Pogun Sabah om Inggisaman KKTP Kumaa Mogigiyon Osiriba’ Karbon.
Minongunsikou om manangkabayahan kumaa Siktor Lanskap om Kelestarian KKTP i toririmo aparagat papalantoi ababayan popotomou KKTP, minongunsikou nogi’ isio kosuul no kumaa koinsanai kotinanan koporintaan, swasta om kotinanan okon koporintaan (NGO), susumikul i nakaampai om pinapalantoi ababayan diti.
Maya’ piromutan pisokodungan diti, nangatan disio oinsanan bohogian montok umampai maganu tonggungan om manahak sokodung id inggisaman mamagampot rikton diti montok no manamong kopomgompian pososorili’ dait’.
Dr. Joachim manangkabahayan nogi’ kumaa bohogian RTM tu’ di kaawagu diti nakalantoi Gaa’ Wartawan Ozon 2023, kopihondot Kimpin Kopurimanan Pongumoligan Lapisan Ozon Sompomogunan 2023 mimpau di hal om uhu Kopoburuan Konsep Otomou.
Nokotindapou nogi’, Monunurat Pointatap Komontirian, Datuk Dr. Jamili Nais; Kumoduo Monunurat Poinatap 1, Stanley Chong; Luguan Monguhup Monunurat (Lanskap), Lar. Nurulhayati Awang More, tongo’ upisor eksekutif, sitaf komontirian, mongingia’ om susumikul.
