Fahmi (toguang, tanga’) guminambar pongingitanan miamapi mogigiyon kampung om tutumombului di nokorikot.
TUARAN: Soginumu’ 60 mantad 67 Projik ‘Point of Presence’ (PoP) Fasa 1 id Sabah naanu minomongo.
Montiri Piromutan om Digital, Fahmi Fadzil minoboros, ginumu’ dilo’ kapaampai sokukuri’ 6,000 premis i karamit surupukaraja’ Jalur Lebar kisiniau akawas.
“Mantad ginumu’ dilo’, soginumu’ iso’ PoP id koiyonon pomorunan di nopongo ilo’ nopo nga’ id Taman Pomorunan Kota Kinabalu (KKIP) Zon Industri 7.
“Miampai koinsanai dilo’, watas KKIP diti kapaampai kinoposodiaan PoP id apat koiyonon miampai sokukuri’ 400 premis, ilo’ nopo 220 montok pomorunan toi komersial om 180 montok premis tiiyonon.
“Naamot montok watas Parlimen Sepanggar diti o kosuul no, soginumu’ tolu PoP di nopongo miampai sokukuri’ dilo’ 300 premis di posodia’ montok gunoon.
“Kopoindalanan Projik PoP Fasa 2 id Sabah potilombus dino kapaampai 636 po koiyonon,” ka disio ontok pinopoimagon Projik PoP Zon Pomorunan id Kampung Lapasan, do tadau Minggu.
Fahmi pinopoilo sokodung kogogonopan jalur lebar ‘gentian optik’ kisiniau akawas i kaanu mongunsub koinggoyoon ababayan pomorunan, mongingkawas kopoopuan kosuul no id koiyonon ngaawi’ pomorunan wagu, potilombus dino kouhup kumaa kosunion ikonomi pomogunon.
“Suai ko ilo’, inggisaman diti nga’ kapanahak kosiwatan kumaa koingkawason ikonomi mimpau ikonomi digital id labus kakadayan.
“Mogigiyon labus kakadayan kaanu popoindalan mogisusuai pitorinaan kaampai pongindopuan id walai maya’ suang piromutan miampai haro gulampot piromutan internet di lobi kosonong om poinpuli,” ka disio.
Kalansanan disio mooi do kogogonopan telekomunikasi i pinosodia’ gunoon miampai poinsonong montok mongingkawas rontob koposion om mongukab karalano’ koposion wagu di lobi kosonong.
Nokotindapou nogi’, Montiri Sains, Tiknologi om Inovasi, Datuk Dr. Mohd Arifin Mohd. Arif; Puru Parlimen Tuaran, Datuk Seri Madius Tangau om Luguan Monunurat Komontirian Piromutan om Digital, Datuk Mohamd Fauzi Md Isa.
