Patrick Er (koduo, gibang) pinapatahak tanda’mato kuminaa di Lau om sinasi’ di Dr. Joachim (tanga), om i Dexter Lau (wanan).
KOTA KINABALU: Kim Teck Cheong Consolidated Berhad (KTC) sinili sabaagi popoikid Hotlink Maxis id Sabah om Labuan.
Kumoduo Boyoon Montiri II, Datuk Seri Dr. Joachim Gunsalam pinopoimagon kinopoimpuunan Popoikid (Pengedar) KTC om Hotlink Prabayar Pinotomod (Eksklusif) montok Sabah id iso’ ababayan pinaanjur id Upis KTC doid Kolombong, do hiti, di tadau baino’.
Nokotindapou nogi’ Potunud Karaja’ KTC, Datuk Lau Kok Sing, tanak disio Datuk Dexter Lau i po nogi’ Potunud Eksekutif KTC, om i Patrick Er, Luguan Upisor Dagangan om Surupukaraja’, Maxis Berhad.
Manangkabayahan kumaa KTC om Hotlink Maxis mantad sokodung dilo’, Dr. Joachim otumbayaan kopio do kosili ilo’ pouyuhon Hotlink di lobi kasanang poinsodia’ kumaa moomoguno, koposodia’ tulun ginumuan piromutan om gulampot di lobi poinggayo id poliliput Sabah om Labuan.
Tumanud disio, koporintaan magalap om lumansan mooi lobi kogumu’ kaanu miromut maya’ pisokodungan diti.
“Pinoilo oku do kinoposilihan KTC nopo kopiongoi di palan Maxis montok mongukab kaganaan kosiwatan wagu padarapas pawaya’an pidagangan poinggayo om koinggayo kumaa pawaya’an wagu id ponongkoiyonon diti. Id siriba’ pibatosan kopoikidan KTC, komponi dilo’ kitonggungan montok papatantu’ kosodiaan pek SIM Hotlink om ‘produk’.
“Oinsanan tokou koilo do KTC nopo songinan komponi nokoulud id Papan Agayo miampai rikod naangayan di ogirot montok goduduo kootusan kousinan om naangayan pongindopuan om nogi’ iso’ mantad mongunguhup bobos atalang Sabah maya’ inggisaman CSR diolo’. KTC nopo popoikid babarang momoguno mamanau osiau (FMCG) i tinuridong montok mogisusuai pungaran nointutunan Malaysia om sompomogunan id ponongkoiyonon diti,” ka disio.
Sabaagi popoikid Hotlink wagu Maxis id Sabah om Labuan, KTC pinopoinggayo kinorikotan Maxis id Sabah om Labuan, koposodia’ piromutan om gulampot di lobi kalaab kumaa moomoguno wagu.
Kopihondot kinoposilihan dilo’, Maxis pinopointutun do ‘Hotlink Prepaid Eksklusif’ montok Sabah, iso’ kopouyuan timpu kirontob i koposodia’ internet 4G/5G aiso’ sapad miampai gatang bobos osiriba’ id pogun doid gatang do RM18 no sombulan. Ilo’ nga’ popouyu nogi’ do siniau internet aiso’ sapad nogi’ ‘hotspot’ om pamalahawan aiso’ rontob, kapanahak moomoguno nawawaya’an asanang miwaliu miampai aiso’ kotongoban.
Daamot dilo’, i Dexter minoboros, KTC ounsikou kopio kaanu misokodung miampai Hotlink, iso’ pungaran nointutunan montok tinonggungan dau kumaa naangayan osonong id surupukaraja’ asanang miwaliu.
“Maya’ pisokodungan diti, moningkanan yahai montok popomogot koposion tulun Sabah miampai poposili produk Hotlink lobi kasanang mganu om manahak diolo’ nawawayaan asanang miwaliu di poinsuul.
Patrick minoboros: “Otumbayaan yahai pisokodungan dahai miampai KTC mogowit kogogonopan kumaa momoguno miampai popomogot kosodiaan kopouyuhan Hotlink, manahak Maxis piromutan nogi’ gulampot di lobi poinggayo padarapas Sabah om Labuan.
“Ounsikou nogi’ yahai montok popoimpuun ‘Hotlink Prepaid Eksklusif’ montok Sabah i kumoinsan montok dahai kopihondot laang kirati id kopomoromitan kinoposilihan KTC sabaagi popoikid Hotlink, i mogowit nogi’ do moomoguno palan prabayar di bobos osonong id gatang di bobos aanu sumanganu miampai internet om siniau aiso’ sapad.”
Sabaagi somboogian mantad tonggungan Maxis montok poposodia’ nawawayaan moomoguno di osonong kumaa tongo’ momomoguno id Sabah, minonuridong ilo’ do songinan ‘Hab Internet Serantau’ id Longkod Operasi Teknikal dau doid Kota Kinabalu do lobi kosopung toun diti.
Maxis nopo nga’ komponi piromutan i kumoinsan montok minonuridong Hab Internet Serantau doid Malaysia Kosilahon, miampai kopongoputan suang sompomogunan miampai mitilombus. Hab nopo dilo’ nga’ kopoopuan piromutan di oponsol montok mongingkawas nawawaya’an internet moomoguno om koponumboyo’ kopomogunaan kosunioon id pomogunaan ‘data’ di akawas.
Montok mongilo kotilombus diti palan Hotlink nogi’ somuli’ di pinotomod, ukaban id: https://www.hotlink.com.my
