Dr. Joachim Gunsalam
LAHAD DATU: Bohogian Kikuasa’ Koiyonon (PBT) kapapanau tonggungan oponsol kopio id koponuridongan kakadayan om pongingiyonon tulun di osimbayan, oumolig, kitinahan om po’ompus, ka di Kumoduo Boyoon Montiri II, Datuk Seri Dr. Joachim Gunsalam.
Kohondot dilo’, ka disio, pamalanan id tikid watas kiguno mimpau kumaa ponginsomokan ‘Infrastruktur Hijau’ (Kogogonopan Otomou) montok mongingkuri’ waya’ pulou linasu’ om monginkuri’ kaantakan kadaaton i kopohompit do kotutudan, magadau om liyud.
“Otumbayaan oku ogumu’ haal ngaawi’ sandad posorili’ aanu monoibau miampai kiwaya’ maya’ pongonsomokan mongingkawas kopurimanan mononduli’ gompi’ sandad posorili’ om manahak kopongokunan kumaa bohogian toi tulun i umampai papalantoi inggisaman momogompi’ sandad posorili’,” ka di Dr. Joachim i po nogi’ Montiri Koporintaan Koiyonon om Pomuwalaian (KKTP) ontok pinopoimagon Bingkil “I-Hijau: Tindakan Bersepadu PBT Bersama Masyarakat” id Taman Bandar Lahad Datu, do hiti, di konihab.
Minagangat toinsanan do umampai momuriman songkuro ginayo waya’ koinsanai kosiimbanon pososorili’ pomogunan kohondot koposion tulun, Dr. Joachim minoboros, koporintaan pogun toririmo tumopot montok papatantu’ do tungkus om intodonon sandad id Sabah toririmo gompion om poburuon miampai poinggompi’ montok kojominan kotilombuson koposion sukod wagu do babaino’ om obontol.
KKTP o paagalan minamalan pipiro katatapan montok papatantu’ kopoburuan lanskap Sabah di osonong, aanu mongingiyon, oulud om ogompi’, ka diiso, i minoboros nogi’ do wookon katatapan nopo Dasar Lanskap Pogun Sabah om Inggisaman KKTP kumaa Mogigiyon Osiriba’ Karbon, i kihontolon montok popoloting rikoton om kopoingubasan nubasanan osiriba’ karbon id kopoburuan.
“Palan inggisaman kopotomohan tilombuson papagaras maya’ palan laang Komontirian id siriba’ katatapan diti do obontol. Kohondot dilo’ komponen Otomou oponsol kopio id kapamalanan kopoburuan doid kinoiyonon uludon sompoopori,” ka disio.
Ka disio, wookon katatapan KKTP i monguhup kopotomohan diti nopo mokianu tikid kolulusan kopoburuan papatatap di popoburu’ pomuwalaian poposodia’ bobos okoor’ 10 pihatus koiyonon osinggawa’ i kiginayo soikar om id kawas doid koposodiaan pososorili’ i osimbayan ilo’ nopo nga’ koiyonon ‘rekreasi’ kumaa tulun ginumuan; kopoindalanan ‘Indeks Bangunan Hijau (GBI)’ gunoon doid pomomonsoi tumanud konsep kopomogompian hinombo do ginoris, waig om i kogogonopan gunoon miampai opulokis; Konsep Otomou di komoyon nopo nga’ miagal ‘pendigitalan lestari’ om komponen Otomou id pomogunaan sistem sumbu solar, sistem kopongonuan waig rasam, kogogonopan di amu’ oyopos, pomogunaan 5R (refuse, reduce, recycle, reuse & revovery) om sopiagal dilo’.
Sabab no do ilo’ nopo nga’ iso’ ababayan oponsol koporintaan pogun do toun diti, Dr. Joachim pinapaatag mooi do inggisaman powonsoiyon montok poposodia’ kointalangan kokomoi songkuro sinodu’ naangayan id palan dilo’.
“Kointalangan (data asas) diti aanu tokou gunoon montok momonsoi pipiro ‘indeks kelestarian’. Miagal do songkuro no kinalantaion tokou id kimpin pomogunaan polositik insan gunoo’ om ingkaa nogi’ rontob sinonong tongo’ baang tokou nogi’ naangayan tokou pinopoindalan inggisaman ngaawi’ tiknologi otomou.
“Mantad ralan diti, kaanu tokou magadang rontob kopomogompian pogun nogi’ mogihum ralan montok momonsoi laang ngaawi’ koponginsonongan,” ka disio.
Kokomoi bingkil dilo’, Dr. Joachim lumansan kopongunsub ilo’ do kopurimanan nogi’ korotian kosuul no id nayatan puru tongo’ kotinanan koporintaan miagal Kounsol Koporintaan Koiyonon, papamanau pomorunan, sukod wagu id nayatan sikul, NGO om tongo’ upisor koporintaan nogi’ mogigiyon ginumuan id kopomogompian om koponguludan sandad posorili’.
Soginumu’ 100 tulun tuminanud bingkil dilo’.
Nokotindapou nogi’ i Upisor Eksekutif Kounsol Watas, Jackley Gielbert.
