Dr. Joachim (tohuri, tanga’) suminasi ababayan minisain MoU id pialatan WWF-Malaysia om Koupisan Mamalan Kakadayan om Watas Sabah (JPBWS) i sopipoopori nobian dii Dr. Henry (gibang) om Potunud Koupisan Mamalan Kakadayan om Watas, Augus Tamaning.
KOTA KINABALU: Koupisan Mamalan Kakadayan om Watas Pogun Sabah om World Wide Fund For Nature – Malaysia (WWF-Malaysia) pinopikogos iso’ Memorandum Pirotian (MoU) do hiti di konihab montok koposodiaan Palan Watas montok onom watas id Sabah.
Suai ko’ mongulud ‘Pelan Struktur’ Pogun Sabah 2033 om Ordinan ‘Perancangan Bandar dan Desa’ (Sabah Cap.141), iti nopo nga’ iso’ inggisaman montok papatantu’ mooi do pamalanan om kopoburuan tana’ id Sabah nopo nga’ opogiuhupan, poinpuli om poinggompi’.
Onom watas dilo’ nopo nga’ Kalabakan, Tawau, Lahad Datu, Kunak, Beluran om Kinabatangan.
Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam i suminasi’ pinisoinan MoU dilo’ minanangkabayahan kumaa goduduo bohogian om minoboros, MoU nopo dilo’ nga’ kopokitanan piilangan om pisokodungan id pialatan koporintaan om tinan okon koporintaan (NGO) montok koundaran Sabah om mogigiyon dau.
“Otumbayaan oku, po’ompus do pinogibabarasan om inggisaman montok momorikot pisokodungan diti, minaganu tokou kokiraan di katatapan Hontolon Sabah Maju Jaya (SMJ), id suang katatapan Malaysia MADANI om rikoton SDG (Sustainable Development Goas),” ka disio.
Dr. Joachim (kotolu, wanan) ruminamit tandamato mantad di Dr. Henry om sinasi’ di Potunud Koupisan Mamalan Kakadayan om Watas, Augus Tamaning, Dr. Robecca (gibang) om Nurulhayati (koduo, wanan).
Dr. Joachim minoboros, pamalanan poinggonop (spatial) nopo nga’ oponsol id kapanahakan puralan kumaa koponguludan kopoburuan, kogunoon om pomogompian tana’ id tososonginan pogun.
Id Sabah ka disio, pamalanan spatial diti poinsuang id Palan Struktur om potilombus dino ginuno id Skim ‘Perancangan: Pelan Daerah dan Pelan Tempatan’ id siriba’ Ordinan Sabah Cap 141).
Goduduo dokumen pamalanan diti nopo nga’ dokumen ‘statutori Perancangan’ i nosili puralan kumaa pamalanan om kopoburuan guno tana’ id nayatan pogun om watas, ka disio kawagu.
“Pinoilo oku do pisokodungan i maan poindalano’ maya’ MoU diti nopo nga’ koposodiaan Palan watas montok onom watas id Sabah. Suai ko’ mongulud kawagu Pelan Struktur Pogun Sabah 2033 om Ordinan Perancangan Bandar dan Desa, iti nopo nga’ montok papatantu[‘ mooi do palan om kopoburuan tana’ id Sabah nopo nga’ opogiuhupan, poinpuli om poinggompi’.
“Mantad do haro dokumen pamalanan di kopogompit koinsanai, poinpuli om poinggompi’, pomogunaan mogisusuai gunotana’ miagal do pomuwalaian, pomorunan, rekreasi, pomutanaman om intodonon sandad aanu uludon monotk mongimbulai pososorili’ di miadas om aanu mongingiyon (liveable).
“Ilo’ oponsol id koponguhupan mongimbulai koyuon di aadas om oumolig montok mongimbayat mongingindapu’ nogi’ mongunsub kopoburuan po’ompus i potilombus dino kapanahak koundaran kumaa mogigiyon mantad sunduk ikonomi, sosial om potilombus dino panamangan sandad posorili’. Ingkaa nogi’ id koponoibahan haal ngaawi’ kosimbanon tawan miagal do koingkawason rontob waig rahat, nogi’ koinsawaton kosoruon kaantakan tawan ‘ekstrem’, pamalanan spatial kapapanau tonggungan oponsol,” ka disio.
Dr. Joachim (poindikau, tanga’) guminambar pongingitanan miampai koinsanai tombului i nokotindapou doid ababayan dilo’.
WWF-Malaysia pinopoindalan Ababayan Lanskap Sabah id apat kinoiyonon lanskap rurubpuon ilo’ nopo nga’ Lanskap Tawau-Kunak, Lanskap Tabin, Lanskap Lower Sugut om Lanskap Heart of Borneo i poposotol do apat koyuon tingkananon pamalanan spatial id Sabah ilo’ nopo nga’ poogompian talun, ponondulian talun, kasasanangan mogigiyon nokoiyonon om kopoburuan gunotana’ di osonong.
Id ababayan diti, tingkananon ponondulian om kopoburuan osonong miampai popiadas pongumoligan talun, mamamasi lalang om baang, kapanahakan setifikit RSPO (Roundtable on Sustainable Palm Oil) om ponondulian ‘koridor ekologi’ (ecological corridors) nogi’ ‘riparian resewes’ minaan poindalano’.
“Suai ko ilo’, WWF-Malaysia nga’pinopoindalan nogi’ tongo’ inggisaman mongintutun om mononduli’ koiyonon mamamasi lalang i kiharo gatang ‘ecological/connectivity’ di oponsol om koiyonon intodonon di poinharo mantad. Kointalangan om atg di aanu mantad inggisaman dilo’ miampai mitilombus kouhup kumaa pamalanan spatial di osompuru, poinpuli om poinggompi montok Sabah.
“Id timpudi miagal, WWF-Malaysia maya’ tongo’ ababayan konservasi dau nga’ monokodung katatapan koporintaan pogun Sabah montok mongumolig poinponu’ 30 pihatus mantad ginayo tana’ dau om mantad kinoliputon talun sandad dau,” ka disio.
Dr. Joachim minoboros, montok mamagampot rikoton pamalanan spatial diti, nosili tonggungan Bohogian Kikuasa’ Nokoiyonon (PBT) om Koupisan Mamalan Kakadayan om Watas Sabah montok papatantu’ mooi do dokumen pamalanan di pinosodia’ aramit guno om kohimagon.
“Unsubon ku nogi’ PBT om Koupisan Mamalan Kakadayan om Watas Sabah montok misokodung oronit miampai WWF-Malaysia id koposodiaan dokumen pamalanan statutori diti.
“Koposodiaan dokumen pamalanan diti nga’ momoguno sokodung di ogirot om osompuru mantad oinsanan bohogian, kaampai tongo’ kotinanan koporintaan id sahau mogisuai komontirian suai.
“Kopuriman tokou, amu’ tokou kaanu kumaraja’ ‘in silo’ om poinpoopori. Tikid agensi toi kotinanan koporintaan di suai kiharo poinloolobi, kabaahan om ginaras sompoopori i aanu poilangan om gunoon montok pogun Sabah om kasasanangan mogigiyon dau,” ka disio.
Dr. Joachim nga’ minongunsub nogi’ oinsanan Upisor Watas om Upisor Eksekutif di nopili’ id koposodiaan palan diti do umampai maganu laang aparagat om gumompit doid kopoindalanan koposodiaan Palan Watas diti.
“Maganu tokou kokiraan pomusarahan nogi’ atag mantad bohogian poinggompit montok kopoburuan di lobi kosonong id watas sompoopori,” ka disio.
Nokotindapou nogi’, Luguan Potunud Konservasi WWF-Malaysia, Dr. Henry Chan; Potunud Poingamung Luguan Ponondulian Gompi’ Sabah, Dr. Robecca Jumin; mobi’ Monunurat Pointatap Komontirian, Arkitek Lanskap, Nurulhayati Awang More nogi’ tongo’ upisor eksekutif.
