Dr. Joachim (kowalu’, gibang) guminambar miampai dilo’ koinsanai Upisor Eksekutif katalib suminasi’ kinapatahakan replika kunci luri mantad Universal Motor (M) Sdn. Bhd. id Wisma Innoprise, di konihab.
KOTA KINABALU: Komontirian Koporintaan Koiyonon om Pomuwalaian (KKTP) pinapatahak 18 tinan luri wagu kumaa 11 Bohogian Kikuasa’ Nokoiyonon (PBT) di konihab montok mongingkawas nimbulayan karaja’ ngaawi’ kopomurisian id kinoiyonon sompoopori.
PBT nopo ngaawi’ dilo’ nga’, Kounsol Watas (MD) Lahad Datu, MD Keningau, MD Ranau, MD Kuala Penyu, MD Sipitang, MD Beluran, MD Telupid, MD Papar, MD Putatan, MD Beaufort om MD Kota Marudu.
Kumoduo Boyoon Montiri II po nogi’ Montiri KKTP, Datuk Seri Dr. Joachim Gunsalam i pinopoindalan kinapatahakan dilo’ minoboros, luri ngaawi diti pinosodia’ montok PBT nopili’ do mongingkawas waya’ karaja’ kopomurisian miagal momirangkat rinomos mantad kinoiyonon pongingiyonon kumaa koiyonon pataaman rinomos.
Ka disio, kinopomilian PBT dilo’ tumanud hombo PBT i otootopot momoguno luri sabab haro o wookon luri diolo’ i amu’ no komilo do gunoon.
Dr. Joachim (poindikau, tanga’) om i Masashi (koduo, gibang) guminambar pongingitanan miampai Upisor Eksekutif i minamaramit replika kunci luri om pinopokito tanda’ ‘osonong’.
“Mongobi’ do komontirian, mongunsikou oku kumaa Komontirian Kousinan (MoF) om lumansan kopomoruhang po do kopoopian kousinan id kopoikidan panahakan kousinan do toun tiso’, 2024. Mantad haro kousinan di korungod, kopomolian padsakaian miagal do luri diti aanu momoruhang montok poikidon kumaa PBT di suai tumanud kopokionuan PBT di nokoinsawat,” ka disio.
Miampai koinsanai dilo’, ababayan di konihab kopiongoi di Hontolon Sabah Maju Jaya (SMJ) hinombo do koporintaan papatantu’ kasasanangan rayat miampai koposodiaan kogogonopan miagal do luri om susuai po.
Dr. Joachim minoboros, koposodiaan tongo’ luri kumaa PBT diti nopo nga’ kopiongoi di Palan Strategik 2021-2025, ilo’ nopo nga’ momoruhang kogogonopan logistik id koinsanai PBT Sabah.
“Kohondot dilo’, Komontirian maya’ Siktor Kopoburuan, Bohogian Koponguludan ‘Sisa Pepejal’ po’ompus do monguhup tongo’ PBT id poliliput pogun Sabah,” ka disio kawagu.
Lumansan nogi’ isio di oinsanan Upisor Eksekutif (PE) poinggompit kaanu papatantu’ luri i pinosodia’ diti gunoon poinponu’ miampai poinsonong om kiwaya’ montok manahak koundaran mogigiyon nokoiyonon id kinoiyonon sompoopori.
“Kiguno kou nogi’ do tongo’ luri opitamangan poinsonong mooi do atahan lobi kalaid,” ka disio pinoposotol.
Pinabanta’ nogi’ disio, do timpu dumontol, kiatag komontirian do momoguno sistem GPS Tracker id tikid luri montok mongingakwas sistem koponguludan padsakaian.
Minanangkabayahan nogi’ isio kumaa Siktor Kopoburuan: Bohogian Koponguludan Sisa Pepajal om ponongkounsikohan kumaa Komonponi Universal Motor (M) Sdn. Bhd., i pinapalantoi Ababayan Kinapatahakan Padsakaian / Misin kumaa PBT montok toun diti.
Nokotindapou nogi’ i Monguhup Montiri II, Datuk Mohd Hamsan Awg. Supai; Monunurat Pointatap Komontirian, Datuk Dr. Jamili Nais; Luguan Upisor Operasi Isuzu Malaysia Sdn. Bhd., Masashi Nujimo; Monijor Totuo Kapadagangan Padsakaian, Chin Hau Yen; om mongongobi’ mantad Isuzu Commercial Vehicle East Malaysia, Eelluddin Firdaus; Potunud Urusan Universal Motor Sdn. Bhd., Chok Yun Kiong; tongo’ upisor eksekutif, luguan siktor om upisor KKTP.
