Hajiji sinuau do lalansanon om puru ngaawi’ parti id kinorikotan doid Ababayan Kopoimaganan Mitingan Tikid Toun Gagasan Rakyat Bohogian Sulaman 2023 id Lintuhun Sri Sulaman, Tuaran, di konihab.
TUARAN: Koporintaan pogun papatantu’ kobolingkahangan kapangabaan waig om lotirik i potoguang mogigiyon Sabah noondo diti aanu manalasai id timpu pialatan duo gisom toun mantad baino’.
Boyoon Montiri (KM), Datuk Seri Hajiji Haji Noor minoboros, pipiro laang naanu om nokoindalan no montok momoruhang ginumu’ pangaba’ goduduo kogugunaan mogigiyon dilo’ mimpuun do babaino’.
Ka disio, ilo’ kopiongoi di tonggungan koporintaan pogun popo’iliu inggisaman monoibau kobolingkahangan pangaba’ waig om lotirik i potoguang mogigiyon pogun diti sabaagi posuulon kumaa kopoinsanangan koposion diolo’.
“Iti no i winonsoi do koporintaan montok papatantu’ rayat kaanu pangaba’ waig om lotirik i nosili kobolingkahangan do babaino’, om potontuon tokou goduduo kobolingkahangan diti aanu manalasai soruruhai do duo toi tolu po toun dumontol. Nung otorina’ do osonong, insyaAllah kaanu tokou monoibau goduduo kobolingkahangan diti i nosili kotongoban rayat do noondo.
“Yati’ nopo nga’ koporintaan di kitonggungan, mantad dilo’ wonsoiyon tokou palan osorisid om papatantu’ do projik kopoburuan rayat koindalan tumanud timpu nakatatap om koindalan miampai osonong,” ka disio ontok minoboros pinopoimagon Mitingan Tikid Toun Parti Gagasan Rakyat Sabah (Gagasan Rakyat) Bohogian Sulaman 2023 id Lintuhun Sri Sulaman, do hiti di konihab.
Hajiji pinopowonsoi gimik kopoimaganan Mesyuarat Tahunan Gagasan Rakyat Bahagian Sulaman 2023 di Dewan Sri Sulaman, Tuaran, hari ini.
Hajiji po nogi’ Presiden Gagasan Rakyat minoboros, montok monoibau waig, Loji Pongubatan Waig (LRA) Telibong II id Tamparuli, doros hiti i masaan do momongo koponginsonongan noondo diti pikikiro kaanu poindalan poinponu’ do kolimpuunon toun tiso’.
Ka disio, kopomongohan projik dilo’ kopomoruhang ginumu’ pangaba’ waig soginumu’ 80 riong liter sangadau (JLS) montok manampung kogunaan id saa’ Kota Kinabalu om watas diti, potilombus dino kopongingkuri’ kakasahan pangaba’ waig i potoguang mogigiyon id goduduo kinoiyonon do noondo diti.
Minoboros isio, loji nopo dilo’ nga’ wookon loji pomoruhang i pinalan montok monoibau kokurion pangaba’ waig id koiyonon longkod pogun om pososorili’ dilo’, kaampai no iso’ po LRA Kogopon, Papar.
“Montok waig, koporintaan pogun nokotimpuun no momonsoi loji montok mongingkawas pangaba’ waig mantad 40 JLS kumaa 80 JLS id Kogopon, Papar i masaan poindalanon miampai kos RM380 riong om opongo do 2026.
“Suai mantad dilo’ soginumu’ 80 JLS kawagu pomoruhang id LRA Telibong II montok monoibau kobolingkahangan waig id saa’ Kakadayan Agayo Kota Kinabalu om Tuaran i koindalan poinponu’ do kolimpuunon toun tiso’,” ka disio i po nogi’ Ponorikohon Gabungan Rakyat Sabah (GRS).
Hajiji ruminamit tandamato mantad di Kumoduo Luguan Gagasan Rakyat Bohogian Sulaman, Datuk Haji Abdul Kassim Razali katalib pinopoimagon Mesyuarat Tahunan Gagasan Rakyat Bahagian Sulaman 2023 di Dewan Sri Sulaman, Tuaran, hari ini.
Ka disio, maya’ inggisaman koporintaan pogun, noruhangan kopoobian RM320 mantad koporintaan Pisompuruan di kaawaguditi montok panalasaian timpu oniba’ kobolingkahangan waig id Sabah, kobolingkahangan pangaba’ waig id pogun diti aanu monoibau miampai lobi kiwaya’.
Montok kapangabaan lotirik, ka disio wookon inggisaman i nanu nopo nga’ maya’ ponuridongan loji ‘janakuasa’ hidroelektrik om wokok id Ulu Padas, Tenom.
Pinointalang disio, kopoindalanan projik dilo’ timpuunan id timpu toruhai om poimpuunon di Luguan Montiri, Datuk Seri Anwar Ibrahim.
Kapt:
