Tun Juhar tinanud di Boyoon Montiri, Datuk Seri Hajiji Haji Noor pinapatahak Gaa’ Tokoh Maulidur Rasul SAW Nayatan Pogun (Bohogian Kusai) kumaa di bagas Monunurat Koporintaan Pogun, Tan Sri Datuk Seri Panglima Sukarti Wakiman id Ababayan Pamaramaian Maulidur Rasul SAW Nayatan Pogun 2023 id SICC, Kota Kinabalu di tadau baino’.
KOTA KINABALU: Koporintaan pogun maya’ secretariat Sabah Maju Jaya (SMJ) mamaso mongulud om popoindalan abaabayan montok momupus komosikinan ‘tegar’ (kadala’) id pogun diti.
Boyoon Montiri (KM), Datuk Seri Hajiji Haji Noor minoboros, wookon laang koporintaan nopo nga’ popoopi’ RM125 riong tikid toun montok Ababayan Walai SMJ do monuridong walai montok mogigiyon mosikin kadala’ i poingulud id e-Kasih doid poliliput pogun.
“Koporintaan nga’ popoobi’ nogi’ soginumu’ RM175 riong pinotomod montok ababayan monoibau komosikinan miampai maganu kosiwatan pakarajaan kumaa tinimungan buntukon do papasaga’ diolo’ lumabus mantad pinonompinian ‘miskin tegar’.
“Koporintaan pogun nga’ mamaramit osonong tonggungan di Luguan Montiri, Datuk Seri Anwar Ibrahim di inggisaman montok papasanang rayat maya’ laang kumaa momupus komosikinan i kohunung di ponudukan Rasulullah SAW,” ka disio id Ababayan Pamaramaian Maulidur Rasul Nayatan Pogun Sabah 1445H/2023M id Longkod Konvensyen Sompomogunan Sabah (SICC) do hiti, di baino’.
Hajiji minoboros, ponuridongan mogigiyon i osonong naangayan tumanud di naangayan sosonginan tinaru toi ummah sabab naangayan ummah di osonong tantu’ no do kopongimbulai pogigiyon tulun di osonong kapanahak kasasanangan kumaa toinsanan.
Tun Juhar tinanud di Boyoon Montiri, Datuk Seri Hajiji Haji Noor pinapatahak Gaa’ Tokoh Maulidur Rasul SAW Nayatan Pogun (Bohogian Kusai) kumaa di bagas Potunud Kolidasan Pogun Sabah, Datuk Dr. Rose Nani Mudin id Ababayan Pamaramaian Maulidur Rasul SAW Nayatan Pogun 2023 id SICC, Kota Kinabalu di tadau baino’.
Ilo’ pogi’ ka disio, kopoburuan tulun nopo nga’ hal oponsol i poinsuang id Dasar Hontolon SMJ i po nogi’ kopiongoi di palan kopoburuan tulun Malaysia Madani kumaa “Baldatun Thoyyibatun wa Rabhun Ghafur” (pogun di osonong kaanu kasagaan om koompunan Tuhan di obinsianan).
Minoboros isio, kopiongoi do hal dilo’ koporintaan pogun manahak koposotolan kumaa balajaran om pintoriningan id siriba’ Hontolon SMJ miampai tuduan mongimbulai ‘modal insan’ di kitoilaan, kikomilaan om abaal, om nogi’ lobi kumaa kopongimbulaian sakag tumungkus i kitoilaan om kaanu popoindalan koinsanai karaja’ om ababayan id mogisuaian hal, miagal pulitik, ikonomi, sosiol om sopiagal dilo’ miampai komilo, kitonggungan om aadang, montok kasasanangan pogun nogi’ koinsanai mogigiyon.
“Mantad no dilo’ om kopiongoi di tingkananon koduo Hontolon SMJ ilo’ nop onga’ Kopoburuan Modal Insan om Kasasanangan Rayat, Ababayan Felo SMJ 2.0 tilombuson do toun diti. Inggisaman Felo SMJ diti nopo nga’ inggisaman koporintaan pogun montok papagaras kopoburuan modal insan id pogun diti. Koporintaan pogun moningkanan poinponu’ kumaa inggisaman papagaras modal insan mooi toririmo kaanu tumopong, ki’inovasi, kiginaras asangal om kitonggungan.
“Ababayan i nokotimpuun kolimpuunon tulan diti, suai ko’ graduan, mongukab tokou nogi’ kosiwatan susumikul nopupusan diploma, Sijil Takawas Sinikulan Malaysia (STPM) om i kitopong dilo’. Poiyonon yolo’ id koupisan om kotinanan koporintaan nogi’ komponi poinggompit koporintaan (GLC) miampai tuduan montok poposodia’ tumungkus kopomuruanan Sabah do timpu dumontol,” ka disio pinoposotol.
Hajiji miampai di Tun Juhar, Kumoduo Boyoon Montiri III po nogi’ Montiri Karaja’ Agayo, Datuk Ir. Shahelmey Yahya, Speaker Lintuhun Undangan Pogun (DUN), Datuk Seri Kadzim M. Yahya, Montiri Sains, Tiknologi om Inovasi Pogun, Datuk Dr. Mohd. Arifin Mohd Arif om rinibuan tulun Islam tuminanud pinghuyudan Kopihondot pamaramaian Maulidur Rasul SAW Nayatan Pogun 2023 id SICC, Kota Kinabalu di tadau baino’.
Hajiji minoboros, koporintaan pogun id waya’an di kohunung kopiongoi di kopoindalanan Palan Kopoburuan SMJ, i babaino’ asil dilo’ okito om opurimanan, lolobi no id inggisaman popoburu’ kawagu ikonomi pogun maya’ konsep osuau mangangapu’ om popoinsanang pitorinaan tongo’ mongindapu om mangangapu’ labus i orohian popoindalan pongindopuan id pogun diti.
Ka disio, sabaagi lansanon ummah, Nabi Muhammad SAW asaru poposorou koponsolon ukhuwah om pisompuruan id mogigiyon om id pogun, tu’ pisongkiwalan om pioduhan id nayatan umat, kopomolomog om kopoimamang diolo’ sondiri, i tohuri nopo koowit kumaa piuriasan om kopupuhon.
Tumanud disio, nubasanan popiodu, sumuli’, tumogod, mogitotondos om mogiurias, okon nopo ko’ kaantob inggisaman monuridong pogun di osompuru, aadang om koburu’, nga’ nogi’ koposili dati’ do mogiurias, olomog om pangakanon.
“Id hal do pogun Sabah, sunduan dountokou om pisompuruan tinaru kiguno toririmo pitamangan om gompion. Noondo nopo nga’ taimpu dati’ do mongingkawas po do silaturrahim, monuridong ukhuwah om piupkatan, tu’ kiguno tokou mamalan om mongulud timpu dumontol di lobi kosimbayanan om kikalantaion, kopinogoi di angkab Malaysia Madani om Hontolon SMJ i tuduan dilo’ montok monsupu’ koburuon om kasasanangan di po’ompus montok purimonon toinsanan,” ka disio kawagu.
Hajiji minoboros, pamaramaian Maulidur Rasul ramaion tikid toun miampai tuduan mooi do sunduan mupus om momolisi di bontugon tagayo Nabi Muhammad SAW kotilombus poinpasi id ginawo tikid tulun Islam.
nokopogulu, i Hajiji miampai di Molohingon Pogun (TYT) Tun (Dr) Juhar Mahiruddin om rinibuan tulun Islam minampai pinghuyudan mantad Padang Merdeka kuminaa SICC.
