Abqaree Fawwaz Abekan
KOTA KINABALU: Dewan Belia Sabah (DBS) i kumoinsan nogi’ pohoroon id Sabah do toun diti momorikot kogompitan soginumu’ 10,000 komulakan id pogun diti sabaagi momimili’ om nogi’ calun i tumanding mongobi’ Lintuhun Undangan Pogun (DUN) sompoopori.
DBS kihontolon montok mongingkawas kororohian nogi’ korotion pulitik komulakan Sabah i nokoinsiriba’ id timpu pototohuri diti.
Presiden Kounsol Komulakan Sabah (MBS), Abqaree Fawwaz Abekan minoboros, korotian pulitik komulakan id pogun diti nopo nga’ kikiro 30 pihatus om ilo’ nopo nga’ kopotongob montok timpu dumontol demokrasi id pogun diti.
DBS nopo nga’ koimpohon bobos osonong montok mongimbayat kawagu kororohian komulakan Sabah montok gumompit id pulitik, ka disio, i minoboros, MBS mimang tinimungan diti toririmo kopuriman do rolou diolo’ toririmo pokinongohon do koporintaan.
“Montok ponimpuunan, do toun diti momorikot tokou kogompitan 10,000 tulun komulakan i potuu sabaagi momimili’ toi ko’ calon i tumanding id DUN sompoopori,” ka di Abqaree id iso’ kointalangan media do hiti, di tadau baino’.
Id timpu di miagal, Abqaree minoboros, asil pogibabarasan atag di puru DBS id Linimput Lintuhun Undangan Pogun Sabah (DUN) Sabah dilo’ patahakon kumaa di Boyoon Montiri Sabah, Datuk Seri Hajiji Haji Noor maya’ Montiri Komulakan om Sipoot Sabah sabaagi intangan do koporintaan pogun doid koponuridongan katatapan om kooturan kopiongoi di angkab komulakan id pogun diti.
“Asil pibarasan atag di puru DBS owiton tokou kumaa di Boyoon Montiri, i Yang Amat Berhormat Datuk Seri Hajiji Noor sabaagi intangan do koporintaan pogun id koponuridongan katatapan om kooturan kopiongoi di angkab 2.2 riong komulakan id pogun diti,” ka di Abqaree.
DBS nopo ababayan kopoindalanan (simulasi) pitimungan montok manahak kosiwatan kumaa komulakan popolombus pomusarahan id pitimungan i pikikiro kapanau do koompokon tulan Kohopod.
Pitimungan DUN i pohoroon pikikiro kapaamapi 73 puru DBS i nakalantoi id pinomilian doid tikid DUN id Sabah.
Koporojistoran calon om momimili’ kiumur 15 gisom 35 toun i nukaban minimpuun di ko 2tw Kosiam katatalib somponon do ko 30tw Kosiam pogulu kopoindalanan pongundian do ko 2 gisom ko 7tw Kohopod.
Naamot, kapahabaran di kalantoi montok tikid DUN poilaan do ko 7tw Kohopod jaam ko 8.30 totuong maya’ kapahabaran pinotomod mitilombus id laman Facebook MBS.
