Hajiji miampai tombului i nokotindapou mantad mogisusuai tinaru kopihondot Ababayan Makan Totuong Kotundunan Sinar Madani Sabah Maju Jaya id SICC, Kota Kinabalu di totuong baino’. Nokotindapou nogi’ i Ponorikohon Yayasan Sinar Kasih, Dato’ Sri Nasir Tun (Dr) Sakaran.
KOTA KINABALU: Duo po inggisaman wagu maan poindalano’ montok monguhup mongingkawas kasasangan rayat id pogun diti, ka di Boyoon Montiri (KM), Datuk Seri Hajiji Haji Noor.
Tumanud disio, inggisaman kumoiso’ nopo nga’ Ababayan Santuni Komuniti i kihontolon montok mongingkawas kohosilon om kapadagangan produk di tongo’ mongungusaha’ tina’ osongulun om koonduan B40 i maan poindalano’ montok minsomok mogigiyon i amu’ songkuro kikosukupan id pogun diti.
Naamot inggisaman koduo nopo nga’ kapaampai kopoikidan ‘Produk Pek Makanan Segera’ kumaa di nongogompitan kadaaton sandad posorili’ i poingiyon id longkod poiyanan naamot, ka disio kawagu.
Hajiji minonuntung tagung ponokotanda’ kinopoimpuunan Yayasan Sinar Kasih id Ababayan Makan Totuong Kotundunan Sinar Madani Sabah Maju Jaya id SICC, Kota Kinabalu di totuong baino’.
Minoboros isio, mogisusuai ponginsomokan i nanu do koporintaan nopo nga’ montok monguhup rayat i aiso’ kosukupan id pogun diti.
“Kopiongoi di hontolon koporintaan pogun, montok popoinsingubas mogigiyon opoduli’ om popomogigiyon surupukaraja’ osonong, koporintaan pogun toririmo mongingkawas kasasanangan rayat.
“Mogisusuai inggisaman om ababayan i po nogi’ ‘flagships’ id siriba’ Palan Kopoburuan Sabah Maju Jaya (SMJ) i pinoindalan pogulu diti kotilombus do toun diti.
“Suai ko’ duo ponginsomokan wagu dilo’, pipiro ababayan i maan tilombuso’ do toun diti wookon Ababayan Homeward montok minsomok rayat i sumakit au’ koundaliu om Ababayan Longkod Koburuon Tanak-Anak (PPKK) montok manahak balajaran tosompung kumaa tanak-anak id koiyonon labus kakadayan i aiso’ kogogonopan Pra-Sikul om Tadika.
“Monilombus tokou nogi’ do Ababayan Outreach Santuni Wanita om Ababayan JHEWAnita montok papagaras tina’ ngaawi’ sosongulun om koonduan B40,” ka disio id Ababayan Makan Doungotuong Sinar Madani Sabah Maju Jaya id Longkod Konvensyen Sompomogunan Sabah (SICC), do hiti, di tadau baino’.
Hajiji tuminindapou Ababayan Makan Totuong Kotundunan Sinar Madani Sabah Maju Jaya id SICC, Kota Kinabalu di totuong baino’.
Kohondot dilo’, i Boyoon Montiri minongunsub siktor korporat om tulun minsosongulun i kikosukupan tumilombus monokodung ababayan kotundunan miagal diti montok monguhup tinimungan kikopomogunaan lolobi no id watas poonsokid om labus kakadayan.
“Nung okon ko’ yati’ i popoindalan karaja’ ngaawi’ kotundunan nga’ isai podi i monguhup diolo’. Iti no pogogoyuon Sabah Madani i kiguno do potonomon tokou sabaagi sayat koposion tokou id Sabah,” ka disio pinoposotol.
Otopot nopo, ka disio, ababayan makan totuong kotundunan diti agayo kopio rati montok monguhup diolo’ i amu’ songkuro kinonosipan doid koponilombusan koposion do babaino’ diti, lolobi no kinotolibon tomporuruol Covid-19.”
“Dadamot tokou kakal koboli takanon om babarang kogogonopan pagakanan, kakal haro tulun ngaawi’ id labus i momoguno ponguhupan mantad dati’,” ka disio.
Minonongkounsikou nogi’ isio kumaa Yayasan Sinar Kasih om tambalut misokodung dau ilo’ nopo nga’ PEWASA om SEAMEX tu’ nakaanu pinapaanjur ababayan makan totuong kotundunan dilo’.
“Kalansanan ku Yayasan Sinar Kasih kaanu tumilombus monguhup pakakaraja’ koporintaan montok kopoburuan ummah id pogun diti,” ka disio.
