Hajiji (kolimo, wanan) miampai tongo’ mamaramit gaa’ akawas id Ababayan Apresiasi Ponguludan Sikul (MAPenS) Toun 2023 id Grand Ballroom, Magellan Sutera Harbour, Kota Kinabalu, di tadau baino’.
KOTA KINABALU: Koporintaan Pogun pinopoobi’ bajet di agayo montok papatantu’ rayat Sabah kaanu balajaran di ogonop, ka di Boyoon Montiri, Datuk Seri Hajiji Haji Noor.
Ka disio, wookon pinoobi’ dilo’ nopo nga’ soginumu’ RM12 riong montok monguhup 1,600 sikul id Sabah maya’ ababayan Ponguhupan Ihsan Sikul Sabah (BISBAH).
Soginumu’ RM4 riong nopo pinoobi’ montok Ponguhupan Kopongundaran Okoro’ Sikul (BALKIS) i pinointutunan toun diti montok monguhup mongundar kinaraagon om koponginsonongan i kopohompit kos id siriba’ RM50,000 nogi’ poinsiriba’, ka disio kawagu.
Tumanud disio, montok papagaras Balajaran Sains, Tiknologi, Kejuruteraan om Matematik (STEM) id Sabah, koporintaan pinopoobi’ soginumu’ RM250,000 montok Ababayan STEM FIESTA om ponuridongan Longkod Sains, Tiknologi om Inovasi (Longkod STI) id Longkod Pambasaan Keningau miampai kos soginumu’ RM3.0 riong om pikikiro opongo koompokon 2023.
Hajiji miampai Montiri Sains, Tiknologi om Inovasi Pogun, Datuk Dr. Haji Mohd. Arifin Mohd. Arif om Potunud Balajaran Pogun, Haji Raisin Saidin guminambar miampai tongo’ monunuduk i nokotindapou id Ababayan Apresiasi Ponguludan Sikul (MAPenS) Toun 2023 id Grand Ballroom, Magellan Sutera Harbour, Kota Kinabalu, di tadau baino’
“Id siriba’ Komontirian Sains, Tiknologi om Inovasi (KSTI), Koporintaan nga’ mamalan popoindalan projik kiwaya’ akawas ilo’ nopo ponuridongan Longkod Sains Sabah id Kota Kinabalu. Naamot ponuridongan Longkod STI id Tawau om Sandakan kigatang lobi mantad RM10.2 riong mantad PETRONAS,” ka disio id Ababayan Apresiasi Koponguludan Sikul (MAPenS) Toun 2023 Koupisan Balajaran Pogun Sabah id Grand Ballroom, Magellan Sutera Harbour, do hiti di tadau baino’.
Hajiji minoboros, koporintaan maya’ KSTI nga’ minanahak kousinan soginumu’ RM320,000 montok ponuridongan 16 tinan sunduk sains id sikul osiriba’, kaampai no manahak toluod montok monginsonong 14 Makmal Sains sikul Mananga’ do otun diti miampai kinopoobian soginumu’ RM280,000.
Tumanud disio, koporintaan pogun nga’ monilombus kopoindalanan pipiro ababayan ponguhupan balajaran do toun diti miagal Ponguhupan Tunai Koporojistoran IPT Miampai One Off (BUDI), Ponguhupan Ihsan Komputer (BAIK), Ponguhupan PIBG (BAGUS), Ponguhupan Tunai Poporisaan (BAKTI) om Ponguhupan Ihsan Sikul Sabah (BISBAH) i atalang nakapanahak ogumu’ koundaran kosuul no id koponginkurian tonggungan kousinan tinimungan mosikin om B40.
Pinosotol disio koporintaan pogun toririmo pointopot montok papagaras kopoburuan balajaran om kogogonopan balajaran id inggisaman mongimbulai modal insan di osonong.
Hajiji tinanud di Montiri Sains, Tiknologi om Inovasi Pogun, Datuk Dr. Haji Mohd. Arifin Mohd. Arif om Potunud Balajaran Pogun, Haji Raisin Saidin pinapatahak Gaa’ Tokoh Kopomuruanan kumaa bagas Potunud Balajaran Pogun, Datuk Hajah Ta Nia Haji Jaman id Ababayan Apresiasi Ponguludan Sikul (MAPenS) Toun 2023 id Grand Ballroom, Magellan Sutera Harbour, Kota Kinabalu, di tadau baino’.
“Iti sabab no miampai balajaran di osonong, kiginoris tokou monimban naangayan koposion rayat i toruhi nopo koponoluod kumaa kalantaion om naangayan osonong pomogunon kosuul no pogun Sabah. Ilo’ nga’ kopiongoi nogi’ di palan kopoburuan Hontolon Sabah Maju Jaya (SMJ) i manahak koposotolan kumaa kopoburuan modal insan,” ka disio kawagu.
Id hal dilo’, ka disio, Koporintaan Pogun tumilombus miuhup miampai Koporintaan Pisompuruan montok papatantu’ karaja’, tonggungan om tinonggungan id kapanahakan balajaran kumaa rayat koindalan miampai poinponu’ ginawo.
Hajiji (kotolu, wanan) pinapatahak Gaa’ Tokoh Guru kumaa bagas Molohingon Sikul Cemerlang Jusa C, Sunthararajoo A/L Rengasamy id Ababayan Apresiasi Ponguludan Sikul (MAPenS) Toun 2023 id Grand Ballroom, Magellan Sutera Harbour, Kota Kinabalu, di tadau baino’.
Hajiji minanangkabayahan kumaa koinsanai 48 mamaramit Ababayan Apresiasi Koponguludan Sikul (MAPenS), sabaagi pongunsikohan om kapamagatangan kumaa puru mongingia’ mantad surupukaraja’ di osonong om tonggungan akawas, toluod nogi’ tinonggungan diolo’ id kopoindalanan karaja’ sabaagi monunuduk kosuul balajaran id Sabah.
Ka disio, tonggungan om inggisaman di tongo’ mamaramit gaa’ doid kinapatahakan tonggungan miampai naangayan di osonong po’ompus surupukaraja’ apatut do unsikohon om turianan do toinsanan.
“Kalansanan ku, tonggungan om inggisaman tongo’ mamaramit gaa’ id kapatahakan tonggungan miampai osonong po’ompus surupukaraja’ apatut ondoson om silihon ombitanan kumaa toinsanan.
“Kalansanan ku mooi do oinsanan puru monunuduk tumilombus monsupu’ kalantaion om popokito kopoindalanan karaja’ di akawas, tumilombus minggisom om kisunduan doid kopoindalanan karaja’ potitikid tadau montok mongimbulai tulun di otudukan om kaanu tumopong id nayatan pomogunan.
“Iti oponsol onuan koposotolan sabab pomogunan tadau babaino’ diti momoguno modal insan di ogirot ginawo mindalan pomogunan aiso’ sapad. Kohondot dilo’, mongimbulai tokou modal insan i kaanu papapanau tonggungan sabaagi mamasok di kinaangayan akawas om umampai koporintaan montok monuridong pogun tinaru i po nogi’ angkabon tokou toinsanan,” ka disio pinoposotol.
