Masidi Manjun
KOTA KINABALU: Iso’ Tinimungan Tusin Amanah Pinotomod Pogun Sabah tinuridong montok popoobi’ poruntukan panampung kokurian kousinan montok ababayan piromutan miampai pongilagan om ponondulian kadaaton, ponoibahan komosikinan om koposodiaan kogogonopan om ‘utiliti’ nogi’ kogogonopan surupukaraja’ sosial.
Lintuhun Undangan Pogun (DUN) Sabah di tadau baino’ pinopolulus ponimbanan kumaa Enakmen Tinimungan Tusin Amanah Koporintaan 1964 (No.9 toun 1964) montok monuridong Tinimungan Tusin Pinotomod Pogun dilo’, miampai mananud kopokionuan Seksyen 10 Akta Tatacara Kousinan 1975 (Akta 61).
Rang Undang-Undang di pinungaranan Enakmen Tinimungan Tusin Amanah Koporintaan (Ponimbanan)2023 dilo’ pinawalad di Montiri Kousinan Datuk Seri Masidi Manjun i minoboros, haro pipiro ababayan i amu’ poingulud id siriba’ katatapan pabalanjaan kapangabaan om koburuon, om iso’ ababayan kiguno turidongon montok monoibau kobolingkahangan labus kopikikiraan, miagal nung aantakan kadaaton sandad.
Kohondot dilo’, ka disio Koporintaan Pogun minaganu laang montok monuridong Tinimungan Tusin Amanah Tabung Amanah Pinotomod Koporintaan Pogun montok manampung nunu-nunu amu’ kogonopan kousinan montok patahakon kumaa komontirian, koupisan, upis watas toi tongo’ kotinanan koporintaan pogun i popoindalan do wookon ababayan miagal id siriba’;
i) Ababayan pongilagan om ponondulian kadaaton sandad i kapaampai do wookon dilo’ nopo kadaaton liyud, tongus opuhod, kotutudan, tana’ otingkau, tana’ otuhan, magadau, tomporuruol om epidemik;
ii) Tongo’ ababayan koponoibahan komosikinan;
iii) Ababayan koposodiaan kogogonopan surupukaraja sosial i kapaampai koposodiaan kogogonopan kakamot pinsingilaan om kakamot kolidasan;
iv) Surupukaraja’ infrastruktur om utiliti i kapaampai pamansaian, koponginsonongan om monginwagu jambatan, talun-alun, tisan otungab nogi’ kogogonopan di suai kaampai no koposodiaan utiliti lotirik, waig om ponimbuuhan; om
v) Nunu-nunu pabalanjaan i pinolulus do Puruankuasa Pinotomodi amu’ poinsuang id hal ngaawi’ di noroitan miagal ponguhupan kumaa nogompitan kadaaton miagal do nogompitan liyud om kinotutudan.
Masidi minoboros, intodonon kousinan Tabung Amanah Pinotomod Koporintaan Pogun diti nopo nga’ kopoopuan mantad Tinimungan Tusin Amanah id tusin pabalanjaan tounan Koporintaan Sabah hinombo doginumu’ amu’ po nakatantu’ do noondo diti.
suai ko ilo’, ka disio, Tabung Amanah Pinotomod Koporintaan Pogun diti kaanu mamaramit toluod mantad tongo’ kotinanan koporintaan, tongo’ tinan korporat, tinan okon koporintaan (NGO, nogi’ mantad minsosongulun om ongopuahang.
“Tabung Amanah Pinotomod Koporintaan Pogun diti nga’ tinuridong sabaagi posodiaan osopung montok popo’iliu kopoopian kousinan Pisompuruan nung Koporintaan Pisompuruan kaakun no do amu’ mamagayat kawagu nombo-nombo poruntukan toun kousinan maso-maso i amu’ no aawi’ momoguno,” ka disio pinopointalang.
“Masidi minoboros, koponguludan om kapanamangan Tabung Amanah Pinotomod Koporintaan Pogun diti poindalanon do Komontirian Kousinan Pogun Sabah. Montok tuduan dilo’, songulun Upisor Perakaunan maan siliho’ do Monunurat Pointatap, Komontirian Kousinan i kitonggungan papa’akaun pomoromitan dana kumaa suang Tinimungan Tusin Amanah dilo’.
“Kohondot dilo’, ponuridangan Tinimungan Tusin Amanah diti nopo oponsol montok papatantu’ Koporintaan Pogun kiharo kousinan korungod montok manampung nunu-nunu kokurion poruntukan lolobi nomontok papatantu’ ababayan koburuon pogun aanu popoindalan miampai oturundus kaampai no montok rayat id timpu koinggoritan om momoguno ponguhupan osikap mantad Koporintaan Pogun,” ka disio.
