Boyoon Montiri, Datuk Seri Hajiji Haji Noor (wanan) miampai tongo’ kumoduo disio, Datuk Seri Dr. Jeffrey Kitingan, Datuk Seri Panglima Dr. Joachim Gunsalam om Datuk Ir. Shahelmey Yahya nogi’ Montiri Kabinet di suai pogulu nokotimpuun pitimungan Lintuhun Undangan Pogun (DUN) Sabah id Kota Kinabalu di tadau baino’.
KOTA KINABALU: Koporintaan Pogun om Koporintaan Pisompuruan maya’ Mitingan Puruankuasa’ Pamalanan om Kopoindalanan Kapangabaan Lotirik om Tarif (JPPPET) Sabah pinopolulus Palan Koburuon Penjanaan montok momogonop kopomogunaan kopokionuan moomoguno.
Monguhup Montiri kumaa Boyoon Montiri, Datuk Nizam Abu Bakar Titingan minoboros, mitingan JPPPET dilo’ pinonorikohon di Datuk Seri Hajiji Haji Noor om Montiri Intodonon Sandad, Sandad Posorili’ om Kosimbanon Iklim (NRECC) di ko12tw Ko’onom 2023.
Pinointalang disio, Palan Koburuon Penjanaan minaganu kokiraan:
(i) kosunion organik (ilo’ nopo kopourutan pomoruhangan kogugunoon winagat di noubasanan po nogi’ kinoinggumuon moomoguno suang pogun moomoguno kategori suai i okoro’), om
(ii) kopomogunaan winagat ‘Step Load’ di moomoguno mantad pomorunan agayo di kitonggungan (komited).
Naaamot karalano’ pamalanan id suang Palan Koburuon Penjanaan nopo pinibahagi kuminaa tolu fasa ilo’ nopo:
(i) Fasa Panalasaian Osikap (2023 – 2025)nopo montok mamagampot ‘jidar’ pinoopi’ penjanaan kumaa rontob ogirot ilo’ nopo 30 pihatus. Id suai komi, nokoopi’ penjanaan kiguno kiharo lobi 30 pihatus (kikiro 300 Megawatt) nung piadangon winagat bobos akawas grid Sabah) i noondo modingkosigampot somok 1,100 Megawatt). Montok tuduan diti, pipiro projik ‘fast-track’ pinatantu’ kaampai no projik poniwaan ‘powership’ kiginaras 224 Megawatt i koindalan id tisan kosilahon Sabah do koompokon toun diti. Naamot mogisusuai laang ‘mitigasi’ di suai masaan om maan poindalano’ montok mongingkawas rontob katalahanan loji janakuasa’ di kiharo mantad.
(ii) Fasa Panalasaian Timpu Gonsuhatan (2026 – 2030) nopo do wookon kapaampai pomoruhangan kapasiti penjanaan mantad intodonon hidro soginumu’ kikiro 400 Megawatt, projik solar kitukuranagayo kiginumu’ 100 Megawatt om susuai projik penjanaan. Suai mantad dilo’, haro nogi’ projik talian kapaatadan agayo 275 kiloVolt ilo’ nopo nga’ kopomongohan toput ‘tara grid’ Sabah miampai Sarawak om projik talian kapaatadan Southern Link i koporomut Sipitang om Tawau. Iti kopoinggirot kapasiti om kaadangan grid Sabah montok mamaramit kopokionuan winagat agayo lolobi no tongo’ moomoguno pomorunan do timpu dumontol.
(iii) Fasa Panalasaian Timpu Anaru (Katalib 2030) nopo moningkanan kumaa mongingkawas kosiwatan hidro elektrik id pogun Sabah maya’ asil ponorisidan Palan Koburuon Hidro i mamaso poindalanon do EnergyCommission of Sabah (ECoS). Suai ko ilo’, kopongukaban kumaa tiknologi om intodonon penjanaan wagu nga’ poindalanon nogi’ miagal do Geothermal, Wind, Hydrogen om Battery Energy Storage System (BESS). Pamalanan pongoputan tara piromutan kapaatadan id pialatan Sabah om Kalimantan Utara nga’ ukabon tumanud asil ponorisidan koonuan kopoindalanan i wonsoiyon do toun diti.
“Koporintaan Pogun monowoli kapanamangan Pangabaan Lotirik om Ginaras Aanu Monginwagu do 3tw Koiso’ 2024 maya’ Pitimungan Pinotomod Lintuhun Undangan Pogun (DUN) potilombus dino kopoimaganan Enakmen Pangaba’ Lotirik 2024, Enakmen Ginaras Aanu Monginwagu 2024 nogi’ ponimbanan Enakmen Suruhanjaya Ginaras Sabah (miampai pomoruhangan tonggungan kapanamangan lotirik om ginaras komilo inwoguan do tadau dilo’,” ka disio id pitimungan DUN Sabah, do hiti di tadau baino’.
Nizam minonimbar ponguhotan mantad di Dr. Daud Yusof (Bongawan) i minuhot kumaa di Boyoon Montiri om nunu o hontolon koponginsonongan kapasiti penjanaan ginaras lotirik id Sabah nung piiradon di kopokionuan moomoguno.
