Dr. Joachim (wanan) ruminamit tandamato mantad di Ar Mok.
KOTA KINABALU: Kumoduo Boyoon Montiri, Datuk Seri Dr. Joachim Gunsalam minongunsub arkitek id Sabah popoolos kabaahan diolo’ id kopongimbulayan panalasaian pomuwalaian di ‘inovatif’ om kos kopipadan ‘efektif’ i koponumboyo’ gunoon koinsanai tinimungan kikoonuan.
Minoboros isio, inggisaman pisokodungan pialatan Koporintaan, Institut Arkitek Malaysia (PAM) Raan Sabah om bohogian kikoponsolon suai kaanu mongimbulai kosimbanon atalang id kopongingkurian kobolingkahangan pomuwalaian i potoguang do rayat.
“Koponsolon walai agaasan sumanganu (rumah mampu milik) om korungod amu’ aanu mombohit. Kopuriman oku kopio kaantaban i potoguang do rayat tokou montok maganu koiyonon i aanu diolo’ komoyon sabaagi walai. Unsubon ku arkitek id Sabah do popoolos kabaahan diolo’ id kapamansaian panalasaian pomuwalaian di inovatif om efektif i koponumboyo’ kogugunoon koinsanai tinimungan kikoonuan.
“Inggisaman pisokodungan pialatan koporintaan, PAM Sabah om boogian kikoponsolon suai kaanu mongimbulai kosimbanon atalang id kopongingkurian hal pomuwalaian i potoguang rayat tokou,” ka disio id Ababayan Makan Doungotuong Tounan PAM Raan Sabah ko-46, do hiti, di totuong tadau Koonom.
Dr. Joachim po nogi’ Montiri Koporintaan Koiyonon om Pomuwalaian Pogun minoboros, okunan disio poinponu’ o koponsolon do seni pomowonsoi id kopoimbulaian koyuyuon di po’ompus om potingkanan montok rayat.
Dr. Joachim (poindikau koonom, gibang) om i Ar. Mok (piondikau koonom, wanan) guminambar miampai Puruankuasa’ PAM Raan Sabah montok sesi 2023-2024 id Ababayan Makan Doungotuong Tounan ko-46 PAM Raan Sabah.
“Sabah, miamapi kopogisusuaian koubasanan i opuawang om kinolumison sandad posorili’ di koimbayat, kosudong kaanu pomowonsoi di osonong i kopomogonop do kointutunan dau. Kosunion om kinoburuon pogun tokou mositi’ miadas di kopomogompian tungkusan tokou om mongumolig sandad posorili’. Arkitek kapapanau tonggungan oponsol id koponigampotan piadasan diti, kopomonsoi koyuon di popiamung miampai oturundus di pososorili’ om monumboyo’ kogugunoon mogigiyon tokou di nokoinggayo.
“Pinoilo oku do PAM Sabah id dingguluonon doid kosokodungan seni pomowonsoi ‘lestari’ om popointutun pomogunaan linimput otomou. Inggisaman dokoyu nopo nga’ kopiongoi di tonggungan koporintaan montok monuridong timpu dumontol di lobi osuau sandad om ogirot. Mantad dilo’, kanou tokou no tumilombus misokodung montok momoguno inggisaman otomou doid projik tokou, monguhup kumaa Sabah di lobi kosonong montok sinakagon dumontol,” ka disio.
Dr. Joachim pinoposotol po nogi’ do koponsolon posuni bakat omulok id tinimungan seni wonsoi.
“Timpu dumontol kaganaan diti poingiliu id longon sakag dumontol. Nosili tonggungan tokou montok mangahak arkitek timpu dumontol, poposodia’ intodonon om kosiwatan i gunoon diolo’ do mimang buru’,” ka disio i minongunsub PAM sabah do tumilombus papaharo ababayan om inggisaman i monokodung koposunian om kopoburuan arkitek omulok.
Miampai pinopolombus koponongkounsikohan au’ gigina’ kumaa PAM Sabah mantad toluod dau i amu’ agatang kumaa seni wonsoi om kinopoburuan pogun solinaid diti, ka id Dr. Joachim, tinonggungan om kabaahan puru PAM Sabah nokouhup minonuridong Sabah suminili koiyonon olumis om aramai miagal do noondo.
“Kanou tokou no toinsanan mamanau id toguang miampai visi oinsanan – visi kosunion di ogirot om inklusif, hinombo seni wonsoi kopongingkawas koposion tokou om momogompi’ koponsolon Sabah koupusan.
“Sodop diti, otimung tokou okon nopo ko’ mamaramai naangayan timpu nakatalib nga’ nogi’ mintong do timpu dumontol. Seni wonsoi kapapanau tonggungan oponsol id koponuridongan lanskap kakadayan om pongingiyonon i kopokito mogigiyon tokou,” ka disio.
Nokotindapou nogi’ i Monunurat Pointatap Komontirian Koporintaan Koiyonon om Pomuwalaian, Datuk Dr. Jamili Nais om kumoduo disio, Stanley Chong; Presiden PAM, Arkitek (Ar) Abu Zarim Abu Bakar; bagas Ponorikohon PAM Raan Sabah (2021-2023), Datuk Ar Haji Shahriman Abdullah; Ponorikohon PAM Raan Sabah di wagu sinili, Ar Mok Juang Yu om Ponorikohon Manganganjur Ababayan Makan Doungotuong Tounan PAM Sabah Bab Sabah ko-46, Ar Justin Yong.
