Hajiji Haji Noor
KOTA KINABALU: Boyoon Montiri (KM), Datuk Seri Hajiji Haji Noor minongunsub kumaa oinsanan rayat Malaysia id pogun diti do popokili Jalur Gemilang montok popokito sunduang mongupus pogun (patriotisme), potilombus dino poposindak kapamaramaian Wulan Kabansaan.
Ka disio, rayat kiguno popokili Jalur Gemilang miampai poinponu’ koondosan lolobi no id walai, linimput upis koporintaan om swasta, premis pongindopuan, padsakaian sompoopori nogi’ hinombo nopo koiyonon di kosudong.
Dr. Joachim Gunsalam (koduo, wanan) minongobi’ di Boyoon Montiri, Datuk Seri Panglima Hajiji Haji Noor id kinopoimpuunan Wulan Kabansaan om Kimpin Pokili Jalur Gemilang Nayatan Pogun Sabah 2023, pinapatahak bondira’ Jalur Gemilang kuminaa tongo’ luguan koupisan, Monunurat Pointatap Komontirian Koporintaan Koiyonon om Pomuwalaian, Datuk Dr. Jamili doid natad Longkod Upis Dewan Bandaraya Kota Kinabalu (DBKK), di tadau baino’.
“Kopihondot Wulan Kabansaan om Kimpin Pokili Jalur Gemilang toun diti, angatan ku koinsanai rayat montok dati’ toinsanan momosik sunduan patriotisme om monginggirot nogi’ momogompi’ pisompuruan id nayatan rayat orukut tinaru tinaru om ugama’ id pogun diti.
“Sabaagi rayat Malaysia, apatut kopuriman tokou do osonong kinonosipan nosili wookon mantad rayat pomogunon di kibantug om nokomordika sabab nokopuriman tokou do koposion id koyuon di oulud, otoronong om ounsikou. Pisompuruan nopo nga’ iso’ kinosonongon di kigatang om amu’ aanu gatangan.
“Mantad dilo’, kiguno ilo’ do upuson, poluhubon om gompion doid tinan dati’ toinsanan mooi do kinomordikaan Malaysia aanu momusus gisom soiraira,” ka disio ontok pinopoimpuun Wulan Kabansaan om Kimpin Pokili Jalur Gemilang Nayatan Pogun Sabah 2023 do hiti, di tadau baino’. Teks boboroson disio binasa’ di Kumoduo Boyoon Montiri II po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam.
Dr. Joachim Gunsalam pinopoimagon gimik kinopoimpuunan miampai tongo’ talap tapantang id natad Longkod Upis Dewan Bandaraya Kota Kinabalu (DBKK), di tadau baino’.
Hajiji minoboros, kapasarabakan sunduan patriotisme id tikid rayat okon nopo ko’ nosili koyuon oponsol id koponuridongan songinan pomogunon tinaru di mordika, nga nogi’ koponuridong piuludan ogirot id nayatan rayat montok monoguang kaantaban agayo do dumontol.
“Mogisusuai ababayan di napalan po’ompus Wulan Kabansaan diti, kaampai no Kembara Merdeka Negaraku onjuran Koupisan Kopointalangan Sabah i tumongkop do pogun montok poposindak po do kopomoritan Wulan Kabansaan.
“Ababayan suai di napalan do wookon, Jalinan Insan Wahana Aspirasi (JIWA), Pialaan Monsupu’ Video Oniba’ Kreatif id Sabahfm, Doa Sayangi Malaysia, Ponomborosan Cinta Negara om Ababayan Semarak Gemilang,” ka disio.
Daamot dilo’, i Boyoon Montiri pinoposotol koponsolon sokodung ouli’ om kouhupan mantad koinsanai bohogian kaampai koupisan om kotinanan koporintaan, siktor korporat, tinan okon koporintaan nogi’ rayat do mamagampot kopoburuan di noulud id palan kopoburuan Hontolon Sabah Maju Jaya (SMJ).
Dr. Joachim Gunsalam (kotolu, wanan) pinopoimpuun kinopoungkoyutan (flag off) Kembara Merdeka Jalur Gemilang pinaanjur Koupisan Kopointalangan Malaysia Watas Sabah, di tadau baino’.
“Kopoindalanan mogisusuai inggisaman kiwaya’ akawas id siriba’ Hontolon SMJ, i nokosuang toun kumoduo kopoindalanan dilo’ nokotimpuun minomiuwa’ asil. Sabah nokoposurat mogisusuai naangayan kopoondos i opokitanan maya’ kinoingkawason kosunion ikonomi om kasasanangan rayat pogun diti id timpu dilo’.
“Kohondot dilo’, id hal diti, piromutan ogirot, pirotian, pogititimbangan nogi’ pisompuruan rayat id oinsanan nayatan nopo nga’ oponsol kopio doid kopotontuan kalantaion kopoburuan id Sabah,” ka disio.
