Hajiji suminasi ababayan ‘angkat sumpah’ di 14 PPM wagu id Menara Kinabalu, Kota Kinabalu, di tadau baino.
KOTA KINABALU: Boyoon Montiri, Datuk Seri Hajiji Haji Noor mokianu oinsanan Lansanon Koburuon Mogigiyin (PPM) manahak surupukaraja bobos osonong kumaa mongungu di id kinoiyonon sompoopori.
“Pasanganu yokoyu karaja oponsol om tonggungan di agayo. Kinoposilihan diti okon i ko’ iso’ kosuulon. Mimang oku dokoyu toririmo misokodung oronit miampai mobi’ rayat dokoyu id kapatahakan surupukaraja kumaa mongungundi.
“Amu’ tokou mimang kokito nombo-nombo mantad dokoyu popowonsoi hal tumanud korohian sondiri, nga mositi dokoyu popoindalan tonggungan dokoyu miampai pointootopot,” ka disio katalib suminasi’ ababayan ‘angkat sumpah’ 14 PPM wagu doid Menara Kinabalu, do hiti di tadau baino.
Hajiji suminasi ababayan ‘angkat sumpah’ di 14 PPM wagu id Menara Kinabalu, Kota Kinabalu, di tadau baino.
Boyoon Montiri minoboros, karaja PPM nopo nga montok manahak kopokitanan atalang di tongo’ katatapan koporintaan, kosuul no kopoburuan di poindalanon id suang timpu duo sitanga toun kumaa nauatan siriba.
“PPM mositi popointalang kumaa rayat palan kopoburuan koporintaan kosuul no Hontolon Sabah Maju Jaya,” ka disio.
Hajiji minoboros, oponsol po nogi montok oinsanan tulun do misokodung sabab koporintaan pogun minggisom montok momunso komosikinan id Sabah.
Miampai kikiro duo po toun pogulu opupusan penggal Koporintaan Pogun do noondo, PPM id nindikohon montok tumorina’ kumaa rayat om, id kopoindalanan dilo, monguhup mobi rayat sompoopori do maganu kawagu timpohon dilo id pomilian agayo pogun do obontol, ka disio.
Hopod om apat PPM i tuminaru id toguang di Boyoon Montiri di tadau baino nopo nga ii Abd. Rashid Saidin (Longkod Upis UPPM), Muhammad Tasan (Bengkoka), Sharif Kadah Sharif Osman (Bandau), Saikom Watis (Kadamaian), Rosita Ganggang (Inanam), Alex Tan Liang Boon (Likas), Lee Li Mei (Api-Api), Chin Thau Kwong (Luyang), Shamsur Zulkifli (Petagas), Cyril Gerald Liew (Kapayan), Ana Maria Bernadus (Limbahau), Max Million Lee Yun Vui (Tanjung Papat), Juslee Arpaih (Sukau) om i Mohamad Latip Katik (Kunak).
Nokotindapou nogi ii Montiri Ponombuluyan om Sandad Posorili, Datuk Christina Liew; Monunurat Koporintaan Pogun, Datuk Seri Sr. Safar Untong; Monguhup Montiri kumaa Boyoon Montiri, Datuk Nizam Abu Bakar Titingan om i Potunud Unit Lqnsanon Koburuon Mogigiyon (UPPM), Datuk Awang Kadin Tang.
