Joniston Bangkuai
KOTA KINABALU: Nunu-nunu pomusarahan toi laang i kopongunsub pisompuruan om koponginggirot Gabungan Rakyat Sabah (GRS) apatut kaanu sokodung, ka di Luguan Kopointalangan GRS, Datuk Joniston Bangkuai.
Pinosotol disio nunu-nunu inggisaman koposuni pisompuruan nopo nga’ arayou om apatut kaanu kopongokunan, iso’ kopurimanan i kotumbayaan disio pogiilangan do nayatan siriba.
Presiden Parti Solidariti Tanah Airku (STAR) Datuk seri Dr. Jeffrey Kitingan di konihab pinapabanta’ do kosiwatan piomungan id pialatan parti disio om Parti Bersatu Sabah (PBS) miampai tuduan montok monginggirot nindikohon pulitik diolo’ dumontol pomilian agayo pgoun do obontol.
Joniston, i po nogi’ Luguan Kopointalangan PBS, mongomi laang miagal dilo’ momoguno ponimbangan di osorisid id pialatan goduduo bohogian.
“Otumbayaan oku pomusarahan dilo’ kiguno pibabarasan lobi pogulu miampai poinpuli di kounsol akawas goduduo parti do lumaang kumaa toguang,” ka disio id iso’ kointalangan di tadau baino’.
Mimpau di koyuon pulitik Sabah i ‘dinamik’, piomugan PBS om STAR kopokito kosimbanon ‘strategik’.
“Id Pomilian Agayo Pogun 2020, haor tindikohon hinombo do PBS om STAR tuminanding sompipi’ diolo’,” ka di Bangkuai i minomuhondom pomilian agayo di kaawagu diti hinombo do PBS nakaanu turu’ tindikohon om STAR nakasanganu onom.
Pinosotol disio kawagu kaantaban po’ompus kopomohogian tindikohon om pomilian calun, intodonon do kokusutan saalom i noilaan doid piomungan pulitik.
Joniston minomuhondom nogi’ pakatan di miagal pogulu Pomilian Agayo Pogun 2018 kapaampai PBS, UPKO om Parti Bersatu Rakyat Sabah (PBRS), sundung kototolu parti dilo’ nop onga’ puru Barisan Nasional (BN).
“Pisompuruan id pakatan pulitik kiharo kosuulon id kaganaan pulitik Sabah. Nuludan i pini’iso’ kikosiwatan manalob laang i kopongurias om kokusutan kokomoi kopotontuan tindikohon.
“Ponimbangan kopio nopo nga’ pisompuruan om kikosiwatan ilo’ do monginggirot piomungan pogun, GRS,” ka disio pinoposotol.
Sundung atag piomungan nakaanu kororohain om koponorisidan di poinralom, kalantaion kopoindalanan dilo’ tumanud di pibabarasan om piokunan poinpuli karait hal oponsol miagal ngaran, simbol om ‘struktur’ kopomuruanan parti wagu.
“Gigisom po dilo’ kopongunsub pisompuruan om kopoinggirot GRS, monokodung oku pomusarahan dilo’,” ka disio.
