Dr. Joachim Gunsalam
KOTA KINABALU: Komontirian Koporintaan Koiyonon om Pomuwalaian (KKTP) om Kotinanan Kopoburuan Pomuwalaian om Kakadayan (LPPB) monuridong iso’ Puruankuasa’ Karaja’ montok popoindalan laang ngaawi’ “pemutihan” kopoimpurakan id Walai Ababayan Pomuwalaian Rayat (PPR) poindalanon do LPPB.
Kumoduo Boyoon Montiri po nogi’ Montiri Koporintaan Koiyonon om Pomuwalaian, Datuk Seri Dr. Joachim Gunsalam i pinapahabar diti minoboros, laang diti nopo nga’ montok papatantu’ imagon di kosudongan tongo’ moniniwa’ montok papatantu’ do yolo’ no i ototopot kosudong om ototopot momoguno kikosiwatan mongingiyon walai PPR diti, nogi’ mongilag diolo’ mogihum kountungan mantad koposiwaan walai PPR, miagal kopoindalanan ‘sewa-atas-sewa’.
Suai mantad dilo’ ka disio, ilo’ po nogi’ nga’ papasaga di tongo’ mongungupalai montok moniwa i kakal ogumu’ poingindad kosiwatan moniwa’ walai di oiduanan do tohuri.
“Komontirian om LPPB nga’ minamaramit guno atag di Boyoon Montiri Sabah montok poposodia’ wookon walai PPR poindalanon LPPB kumaa tongo’ graduan wagu sabaagi koiyonon naamot toi ‘transit home’ diolo’ nanamot diolo’ kaanu karaja’ om koponiwa toi sumanganu walai iyon-iyonon diolo’ sondiri,” ka disio id iso’ kointalangan di tadau baino’.
Nosusuhut mantad ‘surat pekeliling’ karait Kopongiduanan Walai PPR poindalanon LPPB, Dr. Joachim minoboros, Nuludan Montiri Pogun Sabah id mitingan di konihab minganu kopoilaan karait di Buris Puralan Poniwaan Walai Ababayan Pomuwalaian Rayat montok Pogun Sabah, i pinalabus do Komontirian Koporintaan Koiyonon om Pomuwalaian (KKTP) om nokogirotkuasa’ pointonod toun 2012, hinombo timpu bobos alaid di pasagaon montok tongo’ moniniwa’ i kakal kosudong om orohian monilombus koponiwaan katalib timpu 10 toun, timbangon ilo’ montok kopongoputan do LPPB, miampai kookunan mantad Montiri Koporintaan Koiyonon om Pomuwalaian.
“Pinoilo nogi do surat pekeliling mantad LPPB kitadau 19tw Koonom 2023 monuhu di tongo’ moniniwa’ i nakatalib timpu 10 toun do mongiduan walai PPR diolo’, oguno no kumaa di tongo’ moniniwa’ i natagakan kosudongan montok tumilombus mongingiyon walai PPR dilo’.
“Bohogian KKTP om LPPB kakaus di koinsanai koinggoritan di nokoimbulai mantad amu’ kinohunungon suang surat pekeliling dilo’,” ka disio.
Dr. Joachim pinopointalang nogi’, tumanud Katatapan Kopoobian Walai Kos Osiriba’ Montok Posiwaan Pogun Sabah i nokogirot kuasa’ pointonod toun 2018, wookon kosudongan i kapasaga’ sosongulun moniniwa’ atagakan kosudongan montok tumilombus moniwa id walai PPR poindalanon do LPPB diti nopo;
(a) Mongingiyon do walai dilo’ maya’ “sewa-atas-sewa”;
(b) Kinindopuan katalib RM3,000;
(c) Moniniwa’ toi kombiso’ i kiharo walai sondiri;
(d) Moniniwa’ i pinoposili walai sabaagi tuumbaya’an/stor diolo’;
(e) Moniniwa’ pinoposili walai sabaagi ‘homestay’ om/toi
(f) Moniniwa’ i haro siwa’ amu’ nabayaran.
