Hajiji pinopowonsoi gimik kinapatahakan toluod sapi korban kuminaa mobi’ masjid om surau id Ababayan Kinapatahakan Toluod Sapi Korban id Masjid At-Taubah, Kampung Lok Batik, Tuaran di tadau baino’.
TUARAN: Boyoon Montiri, Datuk Seri Hajiji Haji Noor pinapatahak toluod soginumu’ 147 tinan sapi’ korban kuminaa masjid, surau, koupisan om kotinanan koporintaan nogi’ kotinanan okon koporintaan (NGO) montok ibadah korban do Tadau Raya Aidiladha toun diti.
Hajiji po nogi’ Puru Lintuhun Undangan Pogun (ADUN) Sulaman pinapatahak sapi korban ngaawi’ dilo’ doid natad Masjid At-Taubah, Kampung Lok Batik, do hiti, di tadau baino’.
Soginumu’ 34 tinan masjid, 27 tinan surau watas Tuaran om Tamparuli minamaramit kinopoikidan toluod dilo’.
Nakaramit nogi do toluod o Markas Tinimungan Susumangod Tindal Kem Lok Kawi, Koupisan Imigrisin Malaysia Pogun Sabah (Depot Tahanan Imigrisin Papar), Koupisan Padsakaian Ralan Sabah (JPJ), Koupisan Pomojiilan Malaysia, Longkod Pingludaan RELA Pogun, Kampung INTAN Pogun, Koupisan Bomba om Monumpasi Pogun (Akademi), Longkod Upis Pulis Kontinjen Sabah, Univositi Malaysia Sabah (UMS), Longkod Upis Pulis Watas Tuaran om i suai.
Hajiji minintong dilo tongo’ sapi korban i maan poikido’ kumaa mamaramit id natad Masjid At-Taubah, Kampung Lok Batik, Tuaran di tadau baino’.
Hajiji minoboros, Ibadah Korban nopo nga’ nubasanan di ponuhuan kopio id Islam.
“Iti nopo iso’ ibadah i aanu tokou powonsoiyon tikid toun. Miampai toluod daging korban poikidon kumaa tinimungan di momoguno, nga’ lobi po karamai o kapamaramaian Tadau Raya Aidiladha,” ka disio.
Nokotindapou nogi’ i Puru Koundangan Pogun (ADUN) Pantai Dalit, Datuk Jasnih Haji Daya; Panglima Divisyen Kolimo Infantri Malaysia (5 Div), Mejar Jeneral Datuk Abdul Rahman A Wahab; Potunud Koupisan Hal Ugama’ Islam Pogun Sabah (JHEAINS), Datuk Haji Saifulzaman Sangl om Potunud Koupisan Koburuon Islam Malaysia (Jakim) Sabah, Datuk Haji Norjedi Haji Dais om Upisor Watas Tuaran, Mohd. Hazlan Haji Jamlee.
