Hajiji Haji Noor
KOTA KINABALU: Koporintaan Pogun Gabungan Rakyat Sabah (GRS) papawalad Rang Undang-undang Anti-Lompat Parti id pitimungan Lintuhun Undangan Pogun (DUN) Sabah solinaid apat tadau mimpuun suab, ka id Boyoon Montiri (KM) Datuk Seri Hajiji Haji Noor.
Minoboros isio, minsansala’ di totondos Pembangkang, Koporintaan Pogun amu’ monootomod popoinlaid kapawaladan Rang Undang-undang montok magantob mobi’ rayat pgoun mantad mongolon parti.
Undang-undang Anti-Lompat Parti kapaampai ponimbanan Koundangan Pogun om iti momoguno kolulusan Molohingon Pogun (TYT) om i Yang di-Pertuan Agong pogulu aanu pawaladon id DUN, ka disio id boboroson kinopoimaganan mitingan pogulu ababayan do hiti di tadau baino’.
“Mantad dilo’, amu’ otopot miagal tinondos do Pembangkang do tuminootomod tokou popoinlaid dilo’. Kiguno tokou mananud kooturan,” ka disio.
Hajiji om Speaker DUN Sabah, Datuk Seri Kadzim M. Yahya miampai tongo’ Montiri Kabinet om mobi’ rayat koporintaan pogulu mitingan pogulu ababayan id Menara Kinabalu, Kota Kinabalu, di konihab.
Boyoon Motiri minoboros, Rang Undang-undang Ponimbanan Koundangan Pogun momoguno majoriti duo pitolu id DUN montok poluluson.
“Otumbayaan oku RUU dilo’ kaanu sokodung poinponu’ mantad puru GRS om Pakatan Harapan.
“Mongunsub oku nogi’ mobi’ pembangkang do monokodung RUU dilo’, sabab yolo’ nga’ monokodung nogi’ mooi do Undang-undang Anti-Lompat Parti poluluson id Sabah,” ka disio.
RUU Ponimbanan Koundangan Pogun nopo nga’ wookon apat RUU i maan pawalado’ id mitingan kumoiso’ penggal kuma’apat DUN mimpuun ko 22tw Kolimo gisom ko 25tw Kolimo.
Katalib mitingan pogulu ababayan dilo’, Boyoon Montiri tuminindapou kinapamaramaian Tadau Raya Aidilfitri pinaanjur Parti Bersatu Sabah (PBS) id Lintuhun Hakka om Parti Solidariti Tanah Airku (STAR) id Hotel Raia, do hiti.
