Dr. Joachim (ko’onom, wanan) guminambar pongingitanan miampai tongo’ mamaramit Gaa’ Surupukaraja Cemerlang JHEANS Sabah toun 2021 om 2022.
KOTA KINABALU: Koporintaan toririmo mamagatang kolubukan om toluod i pinatahak do kukumaraja’ kopoirntaan i po nogi’ posunduran oponsol sabaagi ejen popiromut do rayat om koporintaan, ka di Kumoduo Boyoon Montiri, Datuk Seri Dr. Joachim Gunsalam.
Mantad dilo’ ka disio, koporintaan manahak kapamaga’an om pongunsikohan i po nogi’ kopokitanan kopodulianan doid mamagatang tongo’ kukumaraja’ koporintaan.
“Sabaagi aset oponsol koporintaan, tongo’ kukumaraja’ koporintaan nga’ kiguno manahak surupukaraja’ bobos osonong id tikid karaja’ di pinoowitan,” ka di Dr. Joachim po nogi’ Montiri Koporintaan Koiyonon om Pomuwalaian id Ababayan Gaa’ Surupukaraja’ Cemerlang (APC) om ‘Jasamu Dikenang’ Koupisan Hal Tanak Mamasok Pogun Sabah (JHEANS) id Hotel Hilton, do hiti di totuong diti.
Dr. Joachim (kotolu, wanan) pinapatahak tandamato kuminaa di Shriley Ipang, mamaramit Gaa’ Surupukaraja Cemerlang JHEANS Sabah toun 2022.
Dr. Joachim minokianu nogi’ mooi do puru karaja’ manahak koposotolan kumaa koponuridongan pogogoyuon (character building) ilo’ nopo nga’ maya’ pomoruhangan toilaan om mongingkawas komilaan (multitasking) kopitanud di kinoinwoguon om nubasanan koyuon wagu.
Iti suai ko’ momoguno koyuyuon osonong om nogi’ kinoulunan osonong kaampai no poposuul do tinonggungan di akawas id kopoindalanan karaja’ di pinatahakan, ka disio kawagu.
“Hal tinonggungan om kopoinggirotan magada’-susuap mositi’ no do toririmo kosili ababayan osuul sosonginan kotinanan mooi do toririmo ogirot om otulid,” ka disio pinoposotol.
Lumansan isio kinapamaga’an om kopongunsikohan id ababayan diti kosili pongunsub pomusarahan om sunduan koinsanai puru karaja’ montok monuridong nubasanan surupukaraja’ di osonong, kitonggungan om kinaangayan akawas kopiongoi di Hontolon Sabah Maju Jaya.
Nokotindapou nogi’ i Monguhup Montiri II Komontirian Koporintaan Koiyonon om Pomuwalaian Sabah, Datuk Mohamad Hamsan Ag. Supain; Monunurat Pointatap, Komontirian, Datuk Dr. Jamili Nais; Kumoduo Monunurat Pointatap II, Faridah Giau; Potunud Koupisan Hal Tanak Mamasok Pogun Sabah, Majaran Bin Osman; Kumoduo Potunud (Kopoindalanan), Siti Zuraihan Ag. Mohd. Husin; Kumoduo Potunud (Koburuon), Datin Dr. Cleopatra @ Clare Asing; Luguan Monguhup Potunud ILMAN, Maraban Tunggkil, tongo’ upisor totuo, sitaf om koinsanai puru koupisan.
