Dr. Joachim (kaapat, wanan) minamaramit tandamato mantad di Jumain om sinasi’ di Jonathan (kotolu, wanan), Abidin (kotolu, wanan) om i Amisah (koduo, wanan).
RANAU: Rayat kaampai no id watas diti nunsub montok momoguno poinponu’ kaadangon pulitik i poinpuriman id pogun diti kosuul no om pomogunon do poinpuli montok mongingkawas rontob sosioikonomi tinan om paganakan.
Kumoduo Boyoon Montiri, Datuk Seri Dr. Joachim Gunsalam i pinopounsub diti minoboros, yolo’ i haro tana’ kiguno tumilombus morobuat dilo’ om popokomosil asil tanom om nogi’ poburuon asil nokoiyonon.
“Sundung tana’ okooro’ nopo, nga’ nung buaton do poinponu’, tantu’ dilo’ kopomiuwa’ asil di osonong, ingkaa nogi’ o asil pinalabus nokoiyonon i okito ku doid sinuusulap do hiti, haro mogisusuai asil kolobusan nokoiyonon i pinokitanan om kikosiwatan montok poburuon om pomogoton po,” ka disio ontok pinopoimagon Ramai Kaamatan Nayatan Watas Ranau i pinaanjur id Lintuhun Mogigiyon Ranau, di tadau baino’.
Dr. Joachim tuminabi’ di Abidin id ramai Kaamatan Nayatan Watas Ranau.
Nokopogulu, i Dr. Joachim po nogi’ Kumoduo Presiden Koisaan Koubasanan Kadazan Dusun (KDCA) minoboros, Ramai Kaamatan kopongimbulai iso’ kosimbanon kumaa mogigiyon orukut tinaru di obinlisi om mogipapantang.
Kohondot dilo ka disio, uhu karamaian Ramai Kaamatan ilo’ nopo nga’ “Kaamatan Mongubasanan Pisompuruan” kotondu’ kopio o timpu dau.
Tumanud disio, Kaamatan koponompuru mogisusuai tinaru i kapaampai do Kadazan Dusun, Murut om Rungus (KDMR) i mamaramai kararamaian nointutunan diti.
“Miampai rati komi di suai, kararamaian diti nopo nga’ iso’ posunduran do misompuru id pogun diti potilombus dino poposili watas kaampai no Ranau lobi koburu’ om komogot,” ka disio.
Dr. Joachim minanahak boboroson id kapamaramaian Ramai Kaamatan Nayatan Watas Ranau.
Puru Lintuhun Undangan Pogun (ADUN) Kundasang dilo’ minoboros, suai ko’ ilo’ Ramai Kaamatan nga’ kotilombus kosili pongimbayat do tutumombului labus om suang pogun.
Korikotan tutumombului diti miampai amu’ mitilombus kouhup ikonomi pogun, ka di Dr. Joachim, i minoboros do, ramai diti nga’ kapanahak nogi’ kosiwatan kumaa mongingindapu’ okoro’ nokoiyonon do maganu nindopuan di lobi id timpu kararamaian soipiagal diti miampai papadagang tongo’ babarang pomolumis-lumis koubasanan, tinunturu’ om takanon koubasanan.
“Kalansanan ku yati’ toinsanan kapamarati komoyon Kaamatan di otopot om kalansanan dokoyu do olihis di mogisusuai ababayan i pohoroon id kapamaramaian Kaamatan miagal do sipoot koubasanan, pialaan
Sugandoi, Unduk Ngadau om susuai po.
“Kainou tokou no toinsanan mamaramai Ramai Kaamatan do toun diti miampai poinponu’ kounsikohan miampai paganakan, koombolutan om oinsanan mogigiyon id pogun Sabah di koupusan tokou diti,” ka disio.
Suai ko’ kapabantug koubasanan om nubasanan id mato pomogunan.
Dr. Joachim (wanan) miampai tombului naalap i nokotindapou pinopoindalan ababayan mongomot id kinapamaramaian Ramai Kaamatan Nayatan Watas Ranau.
Daamot dilo’, isio po nogi’ Montiri Mongulud Koponoguangan Covid-19 Sabah, minamason toinsanan do tumilombus maganu laang mingat-ingat montok mongilag kopogkorolihan Covid-19 id timpu kararamaian diti.
“Toun diti ounsikou tokou tu’ nakaanu mamaramai Kaamatan id timpu kinoompokon tomporuruol Covid-19 miagal pinahabar di Kotinanan Kolidasan Sompomogunan (WHO) di kaawagu diti. Sundung pia do ingkaa, kakal tokou do kiguno mingat-ingat om toririmo mananud atag nogi’ ponuhuan mantad Komontirian Kolidasan Malaysia (KKM) mooi do tomporuruol diti amu’ koguli’ kootung dati’. Monongkounsikou tokou nogi’ sabab nakaanu koporintaan minonoibau kobolingkahangan tomporuruol Covid-19 do solinaid diti,” ka disio.
Minanangkabayahan nogi’ isio kumaa puru komitikuasa’ (AJK) manganganjur i pinonorikohon di Upisor Watas Ranau, Jumain Abdul Ghani.
Nokotindapou nogi’ i Monguhup Montiri kumaa di Boyoon Montiri po nogi’ ADUN Paginanan, Datuk Abidin Madingkir; Puru Parlimen P.179 Ranau, Datuk Jonathan Yasin; ADUN Sinili, Datuk Amisah Yasin; Monguhup Upisor Watas Totuo (Kopoindalanan), Hasinin Kinsim; Monguhup Upisor Watas (Kopotundaan), Marcelus Joannes; Monguhup Upisor Watas (Kopotundaan), Faridah Mohd Jamian; tongo’ luguan koupisan pogun om Piosmpuruan watas Ranau om Puru Komitikuasa’ Kapamaramaian Ramai Kaamatan toun 2023.
