KOTA KINABALU: I Molohingon Pogun, Tun Juhar Mahiruddin (gambar) pinoposorou mogigiyon mooi do amu’ kalawong di koumoligan om kolidasan ontok mamaramai Aidilfitri.
Ka di Tun Juhar, sunduk koumoligan tinan om paganakan kiguno onuan kopomodulianan di poinpatut i potuu id suang toi labus walai.
“Nunu nopo powonsoiyon toi hal i kotinong do kadaaton mositi’ no do ilagon.
“Iti kaampai no ontok id talun-alun i po nogi’ wookon koiyonon i sasaru’ aantakan koligaganan.
“Mingat-ingat om monidsorou no soira’ papamanau id talun-alun miampai mananud kooturan om undang-undang di nokogirotkuasa’,” ka disio.
“Ontok pinapatahak Pason Pinotomod Tadau Agayo Aidilfitri 1444H/2023M, Tun Juhar minagangat tulun Islam id pogun diti mooi do popowonsoi kotundunan miampai kumakap tinimungan di amu’ songkuro kinonosipan id mogigiyon.
“Mositi’ tokou no maganu koundaran tadau om wulan di obitua diti montok monombului tinimungan fakir mosikin, tangaanak yatim, nongogompitan kosusaan om sopiagal dilo.
“Soroho’ no, id kinonuuan tokou haro kinonuuan tulun suai, mantad dilo’ pagaanon longon do manahak ‘infak’ (berinfak), manahak sadakah (bersekedah) om papatahak nunu nopo ponit ponguhupan di ogoosan montok popounsikou koposion diolo’ i amu’ osukupan id tadau-tadau kagayaan miagal Tadau Agayo Aidilfitri diti,” ka disio.
Id pason disio, Tun Juhar minokianu tulun Islam do papatahak sokikinawas kounsikohan kumaa ‘hadrat Illahi Rabbi’ sabab kosiwatan do insan po mamaramit om mamaramai Aidilfitri miampai tambalut, titimbang om nogi’ nongointutunan i okon ko’ kiumaga’ Islam.
“Kopurimanan kopongunsikohan diti pokitanan tokou maya’ kopongonjuran ababayan walai poingukab om popowonsoi nubasanan mogitotombului om mogisisiou sompipi’ koompinoian, ponokotitimbang om koombolutan kaampai no i okon ko’ kiugama’ Islam.
“Nubasanani nosili kinoubasanan id mogigiyon mositi’ gompion om poluhubon montok popoinggirot po do sunduan piobpinoian potilombus dino monginggirot po do piuludan om pisompuruan id pogun diti,” ka disio kawagu.
Ontok tadau kagayaan di obitua diti, minongunsub isio mogigiyon mooi do mogiampai mamagatang buru’ om kolubukan tinimungan kiunifom i toririmo poingunda’ momogompi’ koumoligan om kosimbayanan mogigiyon.
“Kanou tokou no toinsanan papatahak doa kopokionuan kumaa hadrat Allah SWT mooi do toririmo id koyuon pongumoligan om ponontudukan-Dau po’ompus popoindalan karaja’ om tonggungan mongobi’ ugama’, tinaru om pogun,” ka disio.
Minomupus pason disio, Tun Juhar om sawo, Toh Puan Norlidah R.M Jasni sumambayang mooi do Aidilfitri diti lobi kirati om aramai potilombus dino kaanu monginggirot po do piuludan om pisompuruan mogigiyon kipogisusuaian id Pogun Sabah o kosuul no om Malaysia do poinpuli.
“Yoho’ om koinsanai paganakan mamason Kotobian Tadau Agayo Aidilfitri, ‘maaf zahir’ om ‘batin’ kumaa oinsanan tulun Islam om mogigiyon koinsanai,” ka di Tun Juhar.
