Ewon om Dr. Zaliha miniboboros karait ponuridongan Kolinik Kolidasan Kelas 3 Penampang di noundorongan.
KOTA KINABALU: Montiri Koburuon Mongungusaha’ om Koperasi Malaysia, Datuk Ewon Benedick pinaharo pinibabarasan miampai di Montiri Kolidasan, Dr. Zaliha Mustafa karait di koponuridongan Kolinik Kolidasan Kelas 3 Penampang i alaid no do noundarangan.
Pinibabarasan dilo’ nakapanau di konihab notindapou nogi’ di Potunud Koupisan Kolidasan Sabah, Datuk Dr. Rose Nani Mudin om tongo’ upisor Komontirian Kolidasan Malaysia.
Ewon minoboros, kopoinsikapan ponuridongan dilo’ oponsol montok manahak surupukaraja’ kolidasan om kopongusapan susumakit labus kumaa mogigiyon Penampang.
Puru Parlimen Penampang dilo pinopoilo, Koupisan Karaja’ Agayo (JKR) Sabah popoindalan do karaja’ kooonuan projik dilo’ maya’ tender do toun diti.
“Nokoboros ku di Dr. Zaliha mooi do karaja’ koponuridongan dilo’ aanu monimpuun do toun tiso’ soira’ nopo karaja’ kopongonuan maya’ tender i pikikiro maganu timpu gisom onom wulan opongo do toun diti.
“Projik nopo diti nga’ iso’ ababayan i maan ku poiliho’ id Puruankuasa’ Pogintongan Projik-Projik Kiwaya’ Akawas id Penampang suai ko’ projik suai miagal do kapamansaian wagu Tomu Donggongon, projik Pan Borneo, projik sikul om panapad liyud.
“Pointotopot oku papatantu’ projik ngaawi’ i nakabatos kumaa rayat Penampang pogulu diti aanu popoindalan do penggal diti om nogi’ pipiro projik wagu miagal do hub kousahawanan om sopiagal dilo’,” ka disio.
Nokopogulu, Dr. Zaliha pinapaharo kotombuluyan karaja’ id pipiro walai pongubatan id Kota Kinabalu om Papar.
Pinapaharo nogi’ isio kinotombuluyan apantang kumaa di Boyoon Montiri, Datuk Seri Hajiji Haji Noor di tadau baino’.
