Dr. Joachim (kotolu, gibang) guminambar pongingitanan katalib minonuntug tagung pinopoimagon Tadau Paganakan PRBS, om sinasi’ di Makinsos (koduo, gibang).
KUDAT: Kumoduo Boyoon Montiri po nogi’ Montiri Koporintaan Koiyonon om Pomuwalaian Sabah, Datuk Seri Dr. Joachim Gunsalam pinopoimagon Ramai Tadau Paganakan Koisaan Rungus Bersatu Sabah (PRBS) di tadau Ko’Onom.
Id boboroson disio, minamarayou i Dr. Joachim pinggisaman pinoindalan di Presiden PRBS i, OKK Makinsos Nawai doid kinopoonjuran ababayan diti.
Nunsub nogi’ disio o puru koisaan dilo’ do tumilombus misompuru montok kotilombuson koubasanan i notungkusan diolo’.
“Nung amu’ osompuru om aiso’ inggisaman montok monompuru tinaru id Sabah nga’ atagakan tokou do kointutunan toi koubasanan id Sabah diti,” ka disio.
Dr. Joachim monongkirumo dilo puru PRBS i nokotindapou doid ababayan Tadau Paganakan koisaan dilo’ di konihab.
Tinaru Rungus nopo nga’ iso’ mantad rampun Dusun id Sabah. Oinsanan tinaru i haro id pogun diti kaampai no Rungus nopo nga’ pitamangan do Koisaan Koubasanan KadazanDusun (KDCA).
Dr. Joachim po nogi’ Kumoduo Presiden KDCA, minongunsub do tulun ngaawi’ Rungus tumilombus gumompit doid ababayan miagal do monulam tongo’ manik sabab tinaru diti nointutunan no doid pongindopuan tongo’ manik id pogun diti.
Daamot dilo’ i Makinsos minoboros, pinonuridongan PRBS diti montok no do papabantug po do kaadat-adato’ Rungus id watas diti.
Dr. Joachim (koduo, gibang) ruminamit tandamato mantad di Frankey om sinasi’ di Makinsos (gibang).
Ka disio, ababayan diti nopo nga’ ababayan tikid toun i kumoinsan nogi’ pohoroo’ katalib o tomporuruol Covid-19, om minoboros do sabaagi pinonuang ababayan, pipiro i pinoindalan wookon nopo nga’ sipoot raramai om makan doungotuong.
Minonongkounsikou i Makinsos mantad kinorikotan di Dr. Joachim pinopoimagon Tadau Paganakan PRBS diti baino’.
Nokopogulu, i Dr. Joachim tuminindapou do mitingan Puru Puruankuasa’ KDCA id Kota Kinabalu i pinonorikohon di Presiden KDCA, Huguan Siou Tan Sri Joseph Pairin Kitingan.
Nokotindapou nogi’ i Upisor Lansanon Mogigiyon Watas Okoro’ Matunggong, Epson Kawahui minongobi’ di Puru Lintuhun Koundangan Pogun (ADUN) Matunggong, Datuk Julita Majungki; Ponorikohon Manganganjur Ababayan Tadau Paganakan, Frankey Suin; Presiden Tobilung Bersatu Sabah (TOBISA), Muji Ampau; Luguan Komulakan Parti Bersatu Sabah (PBS) Christopher Mandut; Luguan Watas Okoro’ Matunggong om Kota Marudu, OKK Samuil Majuin om i OKK Elui Majikin; bagas YB Matunggong, Sarapin Magana om i Atung Mangabis nogi’ oinsanan AJK Akawas PRBS.
