Hajiji Haji Noor
KOTA KINABALU: Kopirintaan pogun pinopoobi soginumu’ RM107.43 riong kumaa Koupisan Surupukaraja Kotundunan Am, do toun diti, i wookon montok monilombus projik kapamansaian kompleks i gunoon tinimungan tulun suai kohimboguion (OKU) om tulun nolohing.
Boyoon Montiri, Datuk Seri Hajiji Haji Noor minoboros, ilo’ kapaampai ponuridongan Kompleks Bersepadu OKU om tulun nolohing nogi kapamansaian linimput Taman Didikan Tanak-anak Suai Kohimboguion Sandakan; om Kompleks Pingludaan OKU id watas Sandakan.
“Suai ko ilo, montok monilombus panahakan ponguhupan kumaa tinimungan kitoruruol kosuul o OKU, tulun nolohing, tanak yatim om tina’ sosongulunan nogi ponguhupan ginumuan id poliliput pogun diti, koporintaan kaakun popoingkawas poruntukan kuminaa RM76.29 riong do toun diti miampai soginumu’ 24,781 tulun karamit koundaran id siriba ponguhilan diti,” ka disio ontok pinopoimagon Pinomupusan Ababayan ‘Sentuhan Kasih Untaian Budi’ id Taman Didikan Tanak-anak Okuri Kohimboguian, Sembulan, do hiti di tadau baino.
Teks boboroson disio binasa di Montiri Kopotundaan Mogigiyon om Kasasanangan Rayat, Datuk James Ratib.
Kohondot dilo i Boyoon Montiri minoboros, koporintaan pogun monokodung poinponu’ ababayan doun mogigiyon i kapanahak koundaran kumaa tinimungan i momoguno id pogun diti.
Ka disio, inghisaman mahasiswa Balajaran Pongoputan Univositi Utara Malaysia Kampus Kota Kinabalu i minisokodung miampai mogisusuai bohogian suai montok papaanjur ababayan “Sentuhan Kasih, Untaian Budi” id Taman Didikan Tanak-anak Okuri Kohimboguian, Sembulan, gatangon kopio.
“Otopot nopo, monompuan om monguhup mogigiyon i momoguno ponguhupan, osomok kopio id ginawoku. Sabab dilo, ounsikou oku kopio di kinopoindalanan ababayan diti i kapaampai do univositi mantad labus pogun Sabah.
“Iti kopiongoi di tonggungan ouli’ montok koporintaan pogun Sabah do monguhup mogisusuai bohogian, okon nopo ko’ tinimungan susumikul nga nogi tinimungan suai kohimboguion. Pinoilo oku suai ko’ monompuan tangaanak id Taman Didikan Tanak-anak Suai Kohimboguian, Sembulan diti, mogisusuai ababayan suai i pinapanau kaampai nopitabangan, ponomborosan om nogi pinapatahak toluod ponguhupan.
” Pinggisaman miagal diti osonong kopio om kalansanan ku lobi po kogumu’ bohogian suai kaampai susumikul mantad univositi do popoindalan ababayan kotorinaan kumaa mogigiyon i momoguno koponguhupan,” ka disio.
Kalansanan nogi disio kopongonjuran ababayan diti kopongunsub sunduan mahasiswa montok tumilombus papaharo ababayan kikoundaran miagal diti do timpu dumontol.
“Ababayan miagal diti okon nopo ko’ kapanahak koundaran kumaa mogigiyon nga nogi ababayan kiupa’ surupukaraja mogigiyon diti koposuni om koponuridong pogogoyuon susumikul.
“Kapasarabakan koyuyuon miagal koponguludan, kopoindalanan om ponguludan karalano id ababayan kapagaras po do kogoosan mahasiswa id koponoguangan koyuon otopot id pakarajaan,” ka disio.
