Masiung (koduo, wanan) ontok minooi intong koiyonon projik pomuwalaian Kg. Serusup om nonuan kopointalangan kokomoi projik dilo’.
TUARAN: Iso’ po projik pomuwalaian rayat maan waalo’ doid Kampung Serusup, apat kilometer mantad Kakadayan Tuaran, hinombo do koporintaan pogun poposodia’ 1,853 unit walai ogoosan sumanganu (mampu milik) montok tinimungan B40.
Kotinanan Kopotundaan Pomuwalaian om Kakadayan (LPPB) pikikiro popoindalan projik dilo’ id timpu oruhai diti soira’ nopo pibatosan pinomoruhang pisokodungan (kumoinduo) miampai monunuridong osoinan katalib wulan Ramadan diti, ka di Ponorikohon dilo’, Datuk Masiung Banah.
“Soginayo 15.61 ekar id duo kinoiyonon dodoros pinoimagon montok monuridong pomuwalaian dilo’ i kiharo limo blok pangsapuri i kapagawi’ balanja’ RM406 riong,” ka disio ontok minooi intong kosumpakon atag projik dilo’, di konihab.
I Masiung minoboros, mantad tintob dilo’, tolu blok pangsapuri kiharo 1,062 unit iyon-iyonon di waalon id koiyonon kiginayo 8.92 ekar.
Puru Lintuhun Undangan Pogun (ADUN) Kuamut dilo’ minoboros, projik pomuwalaian mampu milik dilo’ nopo nga’ inggisaman koporintaan pogun montok monumboyo’ kogunaan tiiyonon rayat lolobi no tinimungan B40.
Ka di Masiung, projik pomuwalaian dilo’ pikikiro opongo do 2025 om tikid unit pangsapuri kiharo duo pisuk padagangon id gatang RM250,000 om poingkawas.
Tumanud disio, pomuwalaian mampu milik idlo’ poindalanon miampai pisokodungan di monunuridong nokoiyonon.
Ontok kinotombuluyan kinoiyonon dilo’, tinanud i Masiung di kumoduo disio, Datuk Hajah Jamilah Antalib om tongo’ Puru Kotinanan Potunud LPPB.
Monijor Agayo, Rosemary Ahping, Mongungulud Komersial i Della Sindul om Upisor Tana’, Isidore Lajawah nga’ nokotindapou nogi’ miampai mongongobi’ Koupisan Pamalanan Kakadayan om Watas Sabah.
