Hajiji Haji Noor
KOTA KINABALU: Kabinet Pogun id mitingan tikid minggu dau di tadau baino’ pinopolulus pinongolonan ngaran duo komontirian.
Komontirian nopo dilo’ nga’ Komontirian Pomutanaman om Ponginsadaan (Pertanian dan Perikanan), noondo ointutunan sabaagi Komontirian Pomutanaman, Ponginsadaan om Pomorunan Takanon (Kementerian Pertanian, Perikanan dan Industri Makanan – MAFFI), om Komontirian Koburuon Pomorunan (Pembangunan Perindustrian), i babaino’ ointutunan sabaagi Komontirian Koburuon Pomorunan om Kousahawanan (Pembangunan Perindustrian dan Keusahawanan).
Pinapahabar hal dilo’ di tadau baino’, Boyoon Montiri, Datuk Seri Hajiji Haji Noor minoboros, Nuludan Montiri pinopolulus pinongolonan ngaran dilo’ mooi do tuduan, kogunoon om tonggungan komontirian lobi atalang, kosuul no kokomoi koumoligan takanon om koponsolon mongungusaha’ kaampai mongungusaha’ okoro’ om gonsuhatan.
Kopiongoi di kinopongunggaran Kabinet Pogun om kinoponguludan kawagu Kabinet Pisompuruan, minoboros i Hajiji, Koporintaan Pogun pinapatantu’ montok popihunung kaganaan kuasa’ tikid puru Kabinet Pogun kumaa Komontirian Pisompuruan sompoopori id Sabah.
Nosusuhut dilo’, Komontirian Pomutanaman om Kojominon Takanon Pisompuruan id sahau do kaganaan kuasa’ Kumoduo Boyoon Montiri I po nogi’ Montiri MAFFI, Datuk Seri Dr. Jeffrey Kitingan, Komontirian Koburuon Koporintaan Koiyonon Pisompuruan id sahau Kumoduo Boyoon Montiri II po nogi’ Montiri Koiyonon om Pomuwalaian, Datuk Seri Dr. Joachim Gunsalam, Komontirian Karaja’ Agayo Pisompuruan id sahau Kumoduo Boyoon Montiri III po nogi’ Montiri Karaja’ Agayo, Datuk Ir. Shahelmey Yahya naamot Komontirian Kousinan id sahau Montiri Kousinan, Datuk Seri Masidi Manjun.
Komontirian Koburuon Desa om Watas Pisompuruan pinoiliu id sahau kaganaan kuasa’ Montiri Kopotundaan Labus Kakadayan, Datuk Jahid Jahim; Komontirian Ponombuluyan, Kesenian om Koubasanan Pisompuruan id sahau Montiri Ponombuluyan, Koubasanan om Sandad Posorili’, Datuk Christina Liew; Komontirian Pidagangan Sompomogunan Pisompuruan om Pomorunan Pomorunan om nogi’ Komontirian Koburuon Usahawan om Koperasi Pisompuruan id sahau Montiri Koburuon Pomorunan om Kousahawanan, Phoong Jin Zhe om Komontirian Komulakan om Spoot Pisompuruan id sahau Montiri Komulakan om Spoot Pogun, Datuk Ellron Angin.
Manamong Komontirian Sains, Tiknologi om Inovasi Pisompuruan, Komontirian Piromutan om Digital, Komontirian Pinsingilaan Akawas om Komontirian Balajaran nopo nga’ i Montiri Sains, Tiknologi om Inovasi Pogun, Datuk Dr. Mohd Arifin Mohd. Arif, naamot Montiri Koburuon Mogigiyon om Kasasanangan Rayat Pogun, Datuk James Ratib manamong Komontirian Kolidasan, Komontirian Koburuon Koonduan, Paganakan om Mogigiyon, Komontirian Pidagangan Suang Pogun om Kos Sara Hidup om Komontirian Perpaduan Negara.
Boyoon Montiri minoboros, Koporintaan Pogun nga’ pinoposili nogi’ do ponorikohon manganjur montok mogisusuai kapamaramaian om ababayan kararamaian pogun yolo’ nopo nga’ ii Mohd. Arifin montok Maulidur Rasul, Tilawah al-Quran, Maal Hijrah om Tadau Agayo Aidilfitri; Dr. Jeffrey Kitingan montok Kaamatan; Masidi montok Tadau Kabansaan; Liew montok Tadau Malaysia om Dr. Joachim montok Tadau Kouliton Toun di Molohingon Pogun.
