KOTA KINABALU: Moomoguno Sabah Electricity Sdn Bhd (SESB) karamit bunga’ toun-toun kiginumu’ 2.5 pihatus (nogi’ ointutunan sabaagi rebat) mantad ginumu’ diposit lotirik di binayaran.
Bunga’ diti, miagal nakatantu’ id sahau Akta Pangaba’ Lotirik 1990, posuangon doid bil lotirik tongo’ moomoguno mimpuun do tulan Koiso’ diti.
Luguan Upisor Eksekutif SESB, Ir. Ts. Mohd.Yaakob Haji Jaafar minoboros, kopogulian rebat kiginumu’ RM9.1 riong dilo’ posuangon mitilombus doid akaun bil lotirik moomoguno do tulan Koiso’ om tulan Koduo diti.
Ka disio, kopogulian kawagu rebat dilo’ kapaampai soginumu’ 672,624 moomoguno i minomonsoi kapambayaran diposit pointunui id poliliput Sabah om Watas Pisompuruan Labuan.
“Tusin banjar lotirik diti pinoontok sabaagi ‘sekuriti’ kumaa karaagon toi montok momogutas tutang nokologos soira’ momoguno momupus kuntirik pangaba’ hinombo do kopiongoi ilo’ di kooturan 5(5) Kooturan-Kooturan Pangaba’ Mongingigit Lisin 1990.
“Intobon ilo’ miadang duo wulan pomogunaan bil lotirik tumanud pulampai montok onom wulan tohuri o intangan tikid onom wulan,” ka disio id iso’ kointalangan di tadau baino’.
Pinointalang nogi’ disio do kopomoruhangan tusin banjar poontokon no nung haro koingkawason pomogunaan lotirik miamapi pulampai montok onom wulan nung piadangon di tusin banjar poinharo mantad.
Poingkuro po, nung pulampai pomogunaan osiriba’ ko’ mantad tusin banjar, nga’ aanu ilo’ do pogulion kumaa momoguno mantad kopokionuan moomoguno maya’ rebat kumaa bil lotirik diolo’, ka disio.
Moomoguno kaanu momoromut numbur SESB Careline 15454 toi 088-515000 nung momoguno kopointalangan toi moomoguno kaanu ‘download’ aplikasi mySESB maya’ telipaun piowit-owit montok maganu kointalangan kaawagu kokomoi surupukaraja’ SESB.
