Dr. Joachim (gibang) minooi intong koluyungon baang i nokopuhak kinoiyonon walai id Kampung Marakau.
RANAU: Kumoduo Boyoon Montiri po nogi’ Puru Lintuhun Koundangan Pogun (ADUN) Kundasang, Datuk Seri Dr. Joahcim Gunsalam kuminakap tolu paganakan i noinraatan adalaan gama-gama’ liyud id Kampung Marakau, do hiti di tadau Kolimo (13tw Koiso’).
Songulun mantad luguan paganakan nogompitan liyud dilo’, Denis Sading, 58, minoboros, koinsanai diolo’ natampasi doid ponongsawat walai diolo’ ontok sodop kinaantakan dilo’.
Ka disio, koyuon do liyud i naantakan kikiro jam ko 9.20 totuong di ko 4tw Koiso’ nopo nga’ bobos araat kopio, gisom nokoputut jambatan.
Pinopoilo nogi’ i Denis, nakalabai nogi’ o bawang om naka’alai mantad luluyungon kasari’.
Dr. Joachim (tanga’) id kinoiyonon kinaantakan tana’ napayang id Kampung Kalanggaan.
Tolu padsakaian naraag om duo kawagu norulun do liyud di osolog (total lost).
Poingkuro po, monongkounsikou i Denis tu’ aiso’ nokorundun id kinaantakan dilo’.
Monongkounsikou nogi’ yolo’ sabab i Dr. Joachim tuminingan sondiri’ do minooi kakap diolo’.
Pinokianu nogi’ disio Koupisan Perparitan om Saliran (JPS) monginsikap karaja’ popotonduli’ kawagu koluyungon bawang sabab koluyungo’ do noondo diti nokopomuhak tana’ id watas pinomuwalaian om torigi lotirik modingkahaba’.
Ontok tadau di miagal, i Dr. Joachim po nogi’ Montiri Koporintaan Koiyonon om Pomuwalaian miampai sitaf karaja’ DUN Kundasang minooi intong tana’ notuhan om nososot id pipiro kampung wookon dilo’ Kampung Kalanggaan, Desa Aman, Dumpiring Bawah om Kampung Lembah Permai.
Minamason isio mogigiyon mooi toririmo mingat-ingat lolobi no id koyuon tawan noondo i amu’ atantu’.
