Dr Ahmad Zahid Hamidi
KOTA KINABALU: Kumoduo Luguan Montiri, Datuk Seri Dr. Ahmad Zahid Hamidi opoduli’ di bohit do rayat Sabah omn Sarawak i asansagan mambayar tambang pontuludan di apagon ontok karamaian Tadau Raya Aidilfitri.
Mantad dilo’, kopihondot karamaian Ramai Kaamatan do koompokon wulan Kolimo om Gawai do kolimpuunon tulan Ko’onom, minokianu isio di nuludan montiri maya’ Montiri Padsakaian, Anthony Loke do popouyu tambang kapal tumulud di osiriba’ kumaa rayat Sabah om Sarawak i poingkaraja’ doid Semenanjung Malaysia.
“Pinokinongou ku bohit do rayat i asansagan muli’ kumaa kampung nantadon miampai tambang di apagon kopio mantad dilo’, opoduli’ oku kopio om minokianu kumaa nuludan montiri maya’ Montiri Padsakaian mooi do karamaian Kaamatan om Gawai onuan tambang osiriba’ montok rayat Sabah om Sarawak muli’ kumaa kampung nantadon.
“Kalansanna ku kapanahak ilo’ kasasanangan om kosiwatan kumaa tinimungan B40 om M40 i kotoguang do kousinan di kirontob monotk muli’ kampung nantadon sompoopori,” ka disio ontok minoboros id Ramai Walai Poingukab Tadau Raya Aidilfitri Tinan Piromutan UMNO Sabah di konihab.
Nokopogulu id ababayan sopisuai doid MRSM Kota Kinabalu, i Ahmad Zahid minoboros, hal kopohompit tambang apagon dilo’ nopibarasan miampai di komponi pontuludan mooi do popoindalan tonggungan sosiol korporat (CSR) om okon ko’ tumanud kopokionuan om kopouyuhan.
“Kalansanan tokou ontok kararamaian di dumontol, hal diti aanu monoibau miampai osikap.
“Yahai id nayatan longkod opoduli’ kopio di kobolingkahangan i potoguang, lolobi no id sunduk kos pontuludan tawan montok rayat Sabah om sArawak i poingkaraja’ id Semenanjung.
“Intangan tokou ontok Tadau Gawai om Kaamatan mooi do kobolingkahangan diti amu’ nodii koimbulai om yoho’ miampai di Luguan Montiri, Datuk Seri Anwar Ibrahim om Kumoduo Luguan Montiri Datuk Seri Fadillah Yusof monguhup hal diti mooi do aanu popoindalan,” ka disio.
Om nogi ka disio, i Luguan Montiri pinapaatag mooi do turidongon Butik Air ilo’ nopo nga’ komponi pontuludan id pialatan Sabah om Sarawak nga’, kalansanan dilo’ do okon nopo ko’ koporomut do Sabah om Sarawak nga nogi’ popowonsoi pontuludan pialatan Sabah, Sarawak om Semenanjung Malaysia.
Karait atag Kumoduo Boyoon Montiri, Datuk Seri Dr. Jeffrey Kitingan montok monuridong do Bohogian Kikuasa’ Pontuludan Ginumuan Borneo montok Sabah om Sarawak, Ahmad Zahid minoboros, hal dilo’ kiguno intangan di Montiri id Koupisan Luguan Montiri (Hal Sabah, Sarawak om Karaja’ Ngaawi’ Pinotomod) Datuk Armizan Mohd. Ali.
“Kalansanan ku montiri kitonggungan montok Sabah om Sarawak i po nogi’ Puru Parlimen Papar do mogowit hal diti kumaa Kabinet Pogun,” ka disio.
