Hajiji Haji Noor
KOTA KINABALU: Boyoon Montiri, Datuk Seri Hajiji Haji Noor oondos di kinoponowolianan pohimagon Sabah montok 25 pihatus ekuiti (nigitan) id PETRONAS Chemicals Fertilizer Sabah Sdn Bhd (PC FSSB) i minanahak SMJ Sdn Bhd (SMJSB) pasanganu Koporintaan Pogun koposuulan id ammonia kitukuran pomogunan PC FSSB om kogogonopan kopolobusan urea.
Iti naanu pinopowonsoi nosusuhut pinikogosan pibatosan pohimagon pialatan SMJSB om PETRONAS Chemicals Group Berhad (PCG) di tadau baino’, katalib Pinibatosan Osuul (HOA) i sinoinan di ko 9tw Koiso’ 2023.
Hajiji minoboros kinoponowolianan kaawagu diti nopo nga’ wookon mantad di Pibatosan Pisokodungan Komersial (CCA) i sinoinsan do Koporintaan Pogun om PETRONAS di ko 7tw Kohopod om Duo 2021 montok mongingkawas pisokodungan pialatan goduduo bohogian id kopotundaan pomorunan tumau om gas id Sabah.
“Laang di pinadalin id siriba’ Hontolon Sabah Maju Jaya nopo nga’ montok manhaak Sabah piilangan asil di lobi kagayo id pomorunan tumau om gas diti nopo nga’ iso’ ponokotanda’ osonong montok kopoburuan om kosunion ikonomi,” ka disio.
Luguan Upisor Eksekutif SMJSB, Dr. Dionysia Aloysius Kibat om Potunud Karaja’ po nogi’ Luguan Upisor Eksekutif PCG, Ir. Mohd. Yusri Mohamed Yusof sopipoopori suminain montok SMJSB om PCG.
PC FSSB, i tinuridong di toun 2011 montok momonsoi, sumanganu om popoindalan kompleks kopolobusan ammonia om urea bersepadu id Taman Pomorunan Tumau om Gas Sipitang (SOGIP).
Kogogonopan PC FSSB winonsoi montok mongimbulai 1.9 riong tan metrik sontoun ammonia om urea.
Ilo’ nopo nga’ loji ammonia om urea bobos agayo id Asia Tenggara om loji urea kotolu bobos agayo id Asia Pasifik.
Sabah nga’ nokosigampot nogi’ kinoburuon atalang maya’ komponi pasanganu poinponu’ dau, Sabah Energy Corporation (SEC) nosusuhut pinikogosan pibatosan miampai PETRONAS di wulan Kohopod toun nakatalib, i minanahak do SEC aset poluyungan gas hiliran nopili’ om kuntirik pangaba’ gas sandad.
