Dr. Joachim Gunsalam
KOTA KINABALU: Presiden Parti Warisan Sabah (Warisan), Datuk Seri Mohd Shafie Apdal kiguno mokianu ponontudukan undang-undang di poinpatut pogulu mongomi kokomoi pomogunaan Perkara 6(7) Undang-Undang Tubuh Pogun Sabah, ka di ADUN Kundasang Datuk Seri Dr. Joachim Gunsalam.
Minoboros isio, goduduo Kuut Akawas om Kuut Pokinsianan pinopointalang do Perkara 6(&) oguno nopo nung katalib Pomilian Agayo Pogun (PRN) om koduo dilo’, parti pulitik kalantoi lobi mantad 50 pihatus tindikohon di ponongkialaan.
“Atalang kopio di Mohd Shafie pasanganu kointalangan di sala’ om amu’ oilaan poingkuro Koundangan Sabah do oguno,” ka disio sabaagi minonimbar hal i nulingad di Mohd Shafie id kapahabaran media disio d konihab’.
Dr. Joachim i po nogi’ Kumoduo Boyoon Montiri minoboros, id PRN ko-15 i pinaharo di 2020, Warisan nakalantoi no do 29 tindikohon mantad di 73, toi id boros di suai Warisan amu’ nakalantoi majoriti tindikohon i ponongkialaan sabab parti dilo’ nakalantoi no do 39 pihatus mantad tindikohon.
“Di 2020 katalib PRN15, aiso’ iso’ pia parti pulitik i nakalantoi lobi 50 pihatus tindikohon i ponongkialaan. Mantad dilo’ Perkara 6(7) amu’ oguno. Molohingon Pogun (TYT) talib dilo’ minomoguno ponimbangan disio id sahau Perkara 6(3) pinapataru di Datuk Seri Haji Hajiji Haji Noor sabaagi Boyoon Montiri.
“Nung Mohd Shafie moboros do TYT nakasala’ di 2020 montok pinapataru di Datuk Seri Hajiji, nga’ i Mohd Shafie apatut mogowit di TYT kumaa kuut di 2020 om papawalad do kes disio ontok dilo’ do hilo’… komoyon ku do amu’ i Mohd Shafie pinopowonsoi dilo’. Sabab koilo isio do i TYT minaganu lanag di otopot om tumanud koundangan soira’ disio pinapataru di Hajiji sabaagi Boyoon Montiri.
Poingkuro po, nokuro tu’ mongulingad nogi do hal diti do noondo?”
“Perkara 6(7) amu’ nopo oguno do babaino’ diti sabab aiso’ PRN. PRN di dumontol nopo nga’ ontok 2025… ilo’ undang-undang,” ka di Kumoduo Presiden Parti Bersatu Sabah (PBS).
