Jamawi (koduo, gibang) minintong koyuon parit ranahon parai Ralan Langsat-Maas i nuru’ do undaron montok popoluyung kumaa ranahon parai i kopohompit tolu Kampung ilo’ nopo nga’ Kampung Langsat, Salapong om Kampung Sawang.
TENOM: Sistem pomuwoigan id oinsanan Kampung doid watas Lintuhun Undangan Pogun (DUN) Melalap maan insonongai miampai lobi kiwaya’ montok monguhup mororobuat parai, ka di Montiri Pomutanaman, Ponginsadaan om Pomorunan Akanon i p onogi’ Puru Lintuhun Undangan Pogun (ADUN) Melalap, Datuk Jamawi Jaafar.
Jamawi minooi intong Projik sistem pomuwoigan id Baang Kalang di nopongo montok papasanang kapanamanan parai Kampung Kalang.
Minoboros isio, bohogian disio nakaramit kointalangan mantad mororobuat parai id Kampung Kasiai, Langsat, Sawang, Jawa Sumbiling om Kampung Babalang karait kobolilngkahangan sistem pomuwoigan i nokohimpogong kapananaman parai.
“Paagalan id Kampang Kasiai i notommbului konihab, mororobuat amu’ kaanu mananom parai tu’ sistem pomuwoigan amu’ kotorina’ poinsonong.
“Liyud agayo toun nakatalib nakapamayag tolig i winonsoi do Koupisan Pomuwoigan om Poluyungan (JPS), miagal pinoilo di Injinior JPS Watas, Lahaman Dashing. Kohondot dilo’, pamansaian wagu maan poindalano’ do toun diti,” ka disio.
Jamawi (koduo, gibang) minintong koyuon parit ranahon parai i koporomut do Kampung Bunda, Kasiai om Kampung Oloson.
Ka di Jamawi, potontuon disio oinsanan oinsanan kampung i kiharo Koiyonon ranahon id DUN Melalap kaanu ponguhupan ponginsonongan sistem pomuwoigan.
“Tulidon tokou baang montok papatantu’ pangaba’ wait pomuwaig di lobi kosonong, kaampai id Kampung Kasiai.
“Id Kampung Langsat nopo, sistem kopomuwoigan kakal amu’ oulud om momoguno karalano’ laid miagal momoguno watu om karung, ingkaa nogi’ id Kampung Sawang,” ka disio ontok minooi intong iso’ Projik kopomuwoigan i nopongo minomonsoi toun di nakatalib id Baang Kampung Kalang, i nakapanahak waya’ osonong kumaa pananaman parai id Koiyonon dilo’.
Jamawi minintong koyuon Baang Malulut Kampung Oloson I maan wansayai Projik pomuwoigan miagal id Baang Kalang.
Jamawi nga’ minonongkounsikou nogi’ kumaa Injinior JPS i nakasaga’ tuminanud minindahu’ sundung pia do koompokon minggu.
Nokotindapou nogi’ Lansanon Koburuon Mogigiyon (PPM), Denesly Justin om sitaf Unit Lansanon Koburuon Mogigiyon (UPPM) DUN Melalap.
