Jamawi (koduo, wanan) minokinongou kopointalangan mantad lansanon gereja ontok kuminakap koiyonon gereja Kalvari Karismatik.
TENOM: Koupisan Pomuwoigan om Poluyungan (JPS) minggisom monginsikap koponompuanan pampasan om pibarasan gatang kopohompit Gereja Kalvari Karismatik Tenom i noumpadanan gama-gama’ kopoindalanan projik panapad liyud id watas Tenom.
Montiri Pomutanaman, Ponginsadaan om Pomorunan Akanon po nogi’ Puru Lintuhun Undangan Pogun (ADUN) Melalap Datuk Jamawi Jaafar minoboros, haal dilo’ onuan kopomodulianan pointopot montok papatantu’ kotundunan ponguludan gereja om tutumanud dau kotilombus poinggompi’.
“Nakakakap oku koiyonon Gereja Kalvari Karismatik Tenom i poinsumpak id ruludan tolig projik panapad liyud i masaan om maan turidongo’ do kuntiriktor id siriba’ panamangan Koupisan Pomuwoigan om Poluyungan,” ka disio soira’ rinubaan do hiti, di tadau baino’.
Ka disio, bohogian koponguludan gereja pinopoilo gisom noondo diti kakal diolo’ do amu’ nakaramit nunu-nunu pampasan kohondot kopoindalanan projik nokomoi.
“Ponguludan gereja minokianu mooi do koponompuanan pampasan om pibarasan gatang aanu monginsikap nogi’ pouyuhon id rontob di lobi kapatut om kopiongoi di gatang maso-maso,” ka disio.
Minoboros i Jamawi, tumanud kointalangan di naramit, mangangadang koporintaan nokopoindalanan no kapagadangan kumaa koiyonon dilo’, nga’ bohogian gereja kipomusarahan gatang di pinouyu kakal amu’ korungod.
“Kohondot dilo’, bohogian gereja minonili magagadang mimpoopori om kalansanan ku ruputan kapagadangan dilo’ aanu papatahak do osikap mooi do pibarasan gatang aanu popohimagon do poinsonong,” ka disio.
Jamawi (poindikau koonom, gibang) guminambar pongingitanan miampai puru gereja Kalvari Karismatik Tenom.
Pinointalang disio, kopohimogonan pibarasan pampasan oponsol kopio montok papasaga’ bohogian gereja mamalan kopoundolihan om nogi’ maganu koiyonon wagu montok ponuridongan walai sambayangan id kinoiyonon di suai.
“Orohian oku popoinsanang pitorinaan diolo’ mooi do ponguludan gereja koihum koiyonon di kosudong om monuridong kogogonopan walai ibadat di wagu,” ka disio.
Minonongkounsikou nogi’ i Jamawi kumaa ponguludan Gereja Kalvari Karismatik Tenom mantad sokodung di pinatahak po’ompus kinopoindalanan projik dilo’.
“Id doho’ do bohogian, minggisom oku montok papatantu’ diolo’ kaanu kogogonopan walai ibadat di lobi kosonong do timpu dumontol,” ka disio.
Minongomi kopikikiraan montok monimporon koiyonon di poinharo, ka disio, koiyonon tana’ dilo’ nokohimagon nodi toun 2022 po montok tuduan projik panapad liyud.
“Pinoilo oku do JPS om nogi’ bohogian gereja sondiri do tana’ diti nokoimagon no. Nung manu monimban kawagu kinopoimaganan, karaja’ nopo dilo’ nga’ anaru om nuru’ owiton kumaa Lintuhun Undangan Pogun nogi’ kopohompit pipiro prosedur suai,” ka disio.
Ka disio, proses dilo’ kapaganu doti’ timpu di alaid om bohogian gereja nga’ amu’ asaga’ mananggung amu’ kotontuan do poinaru.
“Mantad dilo’, kopokionuan kopio diolo’ nopo nga’ mooi do rontob pampasan di pouyuhon nopo nga’ poinpatut om kopiongoi di gatang maso-maso montok papasaga’ diolo’ maganu linimput wagu,” ka disio.
Jamawi pinoposotol koporintaan pogun toririmo tumopot papatantu’ kopoindalanan projik koburuon koporintaan amu’ koponginraat kotoronongon mogigiyon nogi’ kopotutan nombo-nombo bohogian.
“Manu tokou koburuon koindalan osonong, id timpu miagal kotundunan rayat om kotinanan kougamaan kotilombus omuligan,” ka disio.
Nokotindapou nogi’ Lansanon Koburuon Mogigiyon (PPM) DUN Melalap, Denesly Justin om pipiro po momumuruan gereja.
