Hajiji (poindikau, tanga’) guminambar pongingitanan miampai tongo’ nangaalap, mongingia’ om susumikul Sikul Ugama’ Pogun (SAN) Apas Balung di wagu katalib pinopoimagon sikul dilo’ id Taman Sawit Balung, Tawau di tadau baino’.
TAWAU: Koporintaan pogun miontong di waya’ kinoingkawason tarif (gatang) lotirik kumaa momoguno nosusuhut kinopoindalanan pogintongan kawagu rontob di poinharo mantad id Sabah om Labuan mimpuun ko 1tw Koduo 2026.
Boyoon Montiri (KM), Datuk Seri Haji Hajiji Haji Noor, poingkuro po minoboros, kinoingkawagon i otoguang moomoguno okuuri’ no om amu’ koponginggorit diolo.
“Toririmo tokou mintong waya’ dilo’, nga’ osorou ku waya’ dilo’ okuuri’ no. Nung noondo sosongulun dilo’ mambayar RM100, pikikiro momoruhang no yau RM15. Mantad dilo’, amu i’ koponginggorit kopio nung RM15 tokou kaanu lotirik di osonong, iti o sabab dilo’ (kinoingkawason gatang),” ka disio kumaa magaganu habar katalib pinopoimagon Sikul Ugama’ Pogun (SAN) Apas balung di wagu id Taman Sawit, Balung do hiti di tadau baino’.
Nuhot isio karait kopoindalanan pogintongan kawagu gatang lotirik Sabah Electricity Sdn. Bhd. mimpuun ko 1tw Koduo 2026 i kopokito ponguludan rontob gatang mantad rontob pulampai pogulu 34.52 tusin/kWj) kuminaa 39.70 tusin/kWj.
Boyoon Montiri pinopointalang rontob wagu dilo’ pinolulus do Nuludan Montiri i minaganu kopomodulianan kogugunoon i haro id Sabah do noondo.
“Gatang id Sabah osisiriba’ nung piadangon id Semenanjung, pinopoinsawat tokou no do limo tusin toi 15 pihatus om ilo’ amu’ songkuro koponginggorit do rayat toomod i pikikiro doti’ kikiro 70 pihatus gisom 80 pihatus id Sabah diti.
“Haal diti amu’ aanu mongilag tu’ mananggung tokou kos di akawas, mogisusuai po do babaino’ diti. Mantad dilo’, nuru’ dilo’ montok monoibau koinsanai diti,” ka disio.
Hajiji pinopoilo, noondo diti koporintaan Pisompuruan minanahak subsidi montok pangaba’ lotirik id Sabah i kiginumu’ kikiro RM700 riong sontoun toi RM3.5 bilion suang timpu limo toun.
“Amu’ tokou kaanu po’ompus miagal diti. Nung koinsawat tokuri’ miagal dilo’ tu’ limo tusin, kopongingkuri’ ilo’ do subsidi i patahakon do koporintaan Pisompuruan,” ka disio.
Minoboros isio, Kabinet Pogun kaakun di atag pinotoguang Energy Commision of Sabah (ECoS) om Sabah Electricity soira’ minaganu kokiraan kinoingkawason kos kopoindalanan polobusan ginoris id pogun diti.
Naamot dilo’, karait SAN Apas Balung, ka di Hajiji, oimbayat ginawo disio di inggisaman minonuridong sikul dilo’ i nopongo suang timpu tolu wulan mantad no kouhupan mogisusuai bohogian sabaagi ponimpuunan montok koponuridongan sikul dilo’ pogulu sinusuhut do ponguhupan koporintaan montok minonginggayo dilo’.
Ka disio, oimbayat nogi’ disio di inggisaman ponguludan sikul dilo’ i minomoguno tiknologi Komilaan Winonsoi (AI) kopiongoi di kinoburon maso-maso id kaganaan balajaran.
“Noimbayat ginawo ku, iti sikul ugama kumoiso’ momoguno AI, koimbayat kopio. Iti no timpu i potoguang tokou do obontol diti, tiknologi kinoinwoguan om okon ko’ id sikul koubasanan nopo, nga’ id sikul ugama nogi,” ka disio.
Ka disio, koporintaan pogun nga’ monokodung atag ponguludan sikul dilo’ montok monuridong sikul mananga’ ugama’ sabaagi kotilombuson balajaran ugama’ i tonudon do susumikul dau.
“Ilo’ nopo nga’ iso’ atag di osonong kopio tu’ montok dati’ sikul mananga’ ugama’ nuru’ poinggoyo’on po toi ruhangan po ginumu’ id Sabah tu’ kogunoon mogigiyon Islam akawas kopio montok minsingilo id sikul mananga’ ugama’. Mantad dilo’ palan dilo’ osonong kopio, sikul mananga’ om potilombus dino pikikiro doti’ do univositi Islam om sopiagal dilo’,” ka disio.
Nokotindapou nogi’ i Montiri Koporintaan Koiyonon om Pomuwalaian po nogi’ Exco Ugama’ Pogun, Datuk Dr. Mohad. Arifin Mohd. Arif; Montiri Balajaran, Sains, Tiknologi om Inovasi, Datuk James Ratib; om Montiri Koburuon Komulakan, Komogoton Sipoot om Ikonomi Kreatif, Datuk Nizam Abu Bakar Titingan.
Naamot dilo’, pinopoindalan i Hajiji solat Zohor id Masjid Al-Ansar, Taman Sawit Balung, pinapatahak nogi’ ponguhupan mantad Bohogian Zakat kumaa asnaf di kosudong.
