Hajiji miampai naalap suai guminambar miampai sitaf UPPM om tulun ginumuan i nokotindapou id Ramai Pomupusan Tadau Sipoot om Tadau Paganakan Unit Lansanon Koburuon Mogigiyon (UPPM) P170 Tuaran id Lintuhun Seri Sulaman, Tuaran di tadau baino’.
TUARAN: Ababayan koburuon om koponginwoguan i pinalan do koporintaan kotoguang kopupuhon nung pembangkang onuan mandat katalib Pomilian Agayo Pogun Lintuhun Undangan Pogun Sabah Ko-17 (PRU Sabah) do ko 29tw Kohopod om Iso’ diti.
Boyoon Montiri (KM), Datuk Seri Haji Hajiji Haji Noor pinopolombus kotongoban dilo’ tumanud nawawaya’an soira’ Parti Warisan minonowoli koporintaan di 2018.
Minoboros isio, ontok dilo’ Warisan lobi kogumu’ minaganu laang mimpau do kopurimanan sumuli’, kaampai minomupus konsesi waig i nokoowit kinorugion RM315 riong kumaa koporintaan nogi’ minonginraag kaadangon pangaba’ waig.
“Pinutul diolo’ konsesi waig gisom norugi koporintaan RM315 riong. Amu’ yolo’ momusorou karait do waya’, sumuli’ nopo yolo’, mongudut om monondos. Lansanon miagal diti om parti di buruanon diolo’ amu’ kasaga’ onuan kotumbayaan do momuruan, oromumuk tokou. Rayat nuru’ koilo diti.
“Hinapadan toun nosili mobi rayat, ka id Shafie yau bobos alaid, nga’ pikikiro doti’ do nokolihu yau. Yoho’ amu’ insan pogondos, nga’ nung piadangon, lobi oku po kalaid yoho’ nosili mobi’ rayat ko’ mantad di Shafie,” ka disio.
Minoboros isio dilo’ id Pomupusan Tadau Sipoot om Paganakan Unit Lansanon Koburuon Mogigiyon (UPPM) Parlimen Tuaran id Lintuhun Seri Sulaman, do hiti, di tadau baino’.
Hajiji miampai naalap suai minomutul kek kapamaramaian id Ramai Pomupusan Tadau Sipoot om Tadau Paganakan Unit Lansanon Koburuon Mogigiyon (UPPM) P170 Tuaran id Lintuhun Seri Sulaman, Tuaran di tadau baino’.
Hajiji pinoposotol nogi do songulun po lansanon i nokoumbal id suang kabinet disio nokoumbal sumolod kuasa maya’ “Langkah Kinabalu”, nga’ naangayan dau id koporintaan amu’ kounsub.
“Solinaid id Kabinet, amu’ noilaan impiro no rikot mitingan, amu’ momonsoi karaja’, ogumu’ ralan kiluang. Noondo lobi tolu toun nosili montiri, monoboros do koporintaan amu’ nakalantoi, nga’ otopot nopo i amu’ nakalantoi nopo nga’ yolo’ sondiri, okon ko’ koporintaan di buruanon ku,” ka disio.
Ka di Hajiji, koporintaan Gabungan Rakyat Sabah (GRS) nokoposurat mogisusuai kinalantaion id kaganaan ikonomi, kopoopuan, balajaran om kotundunan rayat, kaampai pinopoindalan ogumu’ inggisaman wagu i amu’ insan powonsoiyo’ koporintaan pogulu diti.
Kohondot dilo’, pinosotol disio do rayat nuru’ manahak mandat kumaa GRS montok papatantu’ kotilombus naangayan om inggisaman koporintaan kotilombus montok koundaran rayat.
Hajiji minongiikiro nogi’ do magawi’ timpu surupukaraja’ dau gisom koompokon penggal Lintuhun Undangan Pogun Ko-17 nung GRS monimporon kalantaion id PRU Sabah.
Calon GRS montok timpohon DUN Sulaman dilo’ minoboros, orohian isio papatantu’ kalantaion mongobi’ do GRS mooi do ababayan koburuon id siriba’ Sondikoton Sabah Maju Jaya (SMJ) kotilombus solinaid limo po toun pogulu papatahak tonggungan kumaa mononowoli dau.
Sabaagi Boyoon Montiri, minoboros isio, minggisom isio montok kasasanangan Sabah om rayat dau miampai amu’ popoindisan mononokodung dau id Sulaman, sundung poingkogos di tonggungan karaja’ pogun di agayo.
“InsyaAllah, nunu nopo i powonsoiyon tokou do osonong, somulian do Tuhan. Kada’ popoimamang toi araat do wokon. Amu’ oku yoho’ insan popoimamang toi araat disaisai sundung diolo’ do atalang id pembangkang.
“Haro upisor i sinili pogulu diti, gigisom po do osonong karaja’ diolo’, kakal diolo’ monilombus karaja’. Ilo’ no o prinsip ku. Mantad dilo’ sundung do yoho’ Boyoon Montiri laid, amu’ oku insan papataam tulun. Nung adalaan ‘kokodou’, komoyon tokou do tulun olomog toi ‘sentimental’,” ka disio.
Pinoposorou nogi isio oinsanan bohogian, kaampai lansanon parti komponen GRS om siriba’ id Tuaran, do paptantu’ sokodung agaras kumaa GRS montok monilombus koporintaan.
“Mositi’ tokou haro sunduan di osonong montok papatantu’ kalantaion koporintaan tokou. Mantad ko’ momili’ tulun suai, lobi kosonong rayat momili parti tokou, GRS,” ka disio pinoposotol.
