Duarin (poindikau kotolu, gibang) miampai nuludan AJK STAR Tanjung Keramat pinahabar luminabus STAR om monokodung GRS.
PUTATAN: Luguan Bohogian Parti Solidariti Tanah Airku (STAR) Tanjung Keramat, Datu Duarin Harris miongiliu karaja’ poinggirot kuasa’ misondikot, nga’ isio om oinsanan bohogian kakal monokodung kopomuruanan Gabungan Rakyat Sabah (GRS) nogi’ Boyoon Montiri, Datuk Seri Haji Hajiji Haji Noor.
Haal dilo’ pinoilo disio id surat pinotomod kitadau 15tw Kohopod i pinaatod kuminaa di Presiden STAR, Datuk Seri Dr. Jeffrey Kitingan maya’ Monunurat Agayo parti, Datuk Edward Linggu.
“Yoho’ miampai diti minongiliu karaja’ sabaagi Luguan Bohogian STAR Tanjung Keramat N24 Putatan poinggirotkuasa’ do ko 15tw Kohopod 2025. Oinsanan Puruankuasa’ Bohogian nga’ minongiliu karaja’ diolo’ poinggirotkuasa’ misondikot,” ka disio id surat dilo’.
I Duarin minonongkounsikou nogi’ kumaa di Dr. Jeffrey mantad kotumbayaan om sokodung pinatahak po’ompus timpu kopomuruanan parti dilo’ di toun 2021 gisom 2025, nogi’ pinoposotol do tonggungan disio montok tumilombus miampai poburuon GRS id siriba’ kopomuruanan di Hajiji.
“Sundung suminunsuri oku mantad karaja’ Luguan Bohogian, yoho’ om oinsanan pakakaraja’ STAR Tanjung Keramat toririmo ogirot miampai GRS nogi’ kopomuruanan di Hajiji,” ka disio.
Laang di Duarin miampai oinsanan nuludan kopomuruanan bohogian minongiliu karaja’ nopo nga’ kinoumpadanon agayo STAR dumontol Pomilian Agayo Pogun Sabah.
Laang dilo’ kopokito katagakon sokodung kumaa STAR soira’ parti dilo’ luminabus mantad gabungan GRS – kootusan i okito do kogumuan id nayatan siriba’ sabaagi laang i kopomolomog pisompuruan pulitik id Sabah.
Mogigintong pulitik nokoiyonon kikopomusarahan, kinosunsurianan aandad lansanon STAR Tanjung Keramat diti okon nopo ko’ koponginraag ginaras parti id watas Putatan, nga kapanahak nogi’ kokitanan do sokodung nayatan siriba’ do noondo lobi kumaa gagasan GRS i buruanon di Hajiji.
Laang di Duarin nopo nga’ kopiongoi id ningkakaton ogumu’ bagas lansanon STAR di suai i minomili’ montok tumilombus miampai GRS tu’ otumbayaan di sondikoton kopomuruanan di Hajiji i poposotol kaadangon pulitik, pisompuruan pogun om kotilombuson koburuon rayat.
