Hajiji minonisiwo di Benney i natagakan sawo om duo tanak dau id kinaantakan tana’ notuhan id Kampung Marahang Tuntul, Papar.
KOTA KINABALU: Boyoon Montiri, Datuk Seri Haji Hajiji Haji Noor, di tadau baino’ kuminakap pipiro kinoiyonon i nadalaan noinraagan gama-gama’ tana’ nopiang om liyud id Beaufort, Bongawan, Papar, Kinarut, Penampang om pososorili’ do hiti.
I Hajiji pogulu dilo’ kuminakap Dewan Raya Tandugal Kampung Mook id Kinarut, kinoiyonon disio ruminuba’ di Aristhole @ Jude Joseph i natagakan di sawo dau, Emily Johnny, 38, om tanak kusai diolo’, Xarell Myre Aristhole, 11, soira’ walai diolo’ nountunan tana’ nosusuhut rasam asapou di ko 15tw Kosiam katatalib.
Pinapatahak isio toluod kaampai ponguhupan kuminaa di Aristhole om tongo’ tadi’ dau do pongundar walai diolo’ pogulu minooi intong id kinoiyonon kinaantakan araat dilo’.
Hajiji pinopolombus kopokisiohan kumaa di Aristhole i natagakan sawo om tanak dau id kinaantakan tana’ notuhan di ko 15tw Kosiam id Kampung Mook, Kinarut.
Talib dilo’, i Boyoon Montiri minonilombus kotombuluyan doid Dewan Kampung Marahang, Papar, do ruminuba’ di Benney Binjamis @ Emis i natagakan di sawo dau, Wong Moi Ling @ Meymey, 34, om duo tanak dioo’, Kamey Asphereynda Benney, 10, om i Christen Kell Benney, 6, soira’ walai diolo’ id Kampung Marahang Tuntul, nountunan tana’ notuhan di minsusuab ko 15tw Kosiam.
Pinapatahak nogi’ i Hajiji ponguhupan kumaa di Benney om pagakanan dau.
Hajiji pinatahak ponguhupan tusin ihsan (BWI) kuminaa songulun mantad di nogompitan liyud id PPK Salagon, Beaufort.
Posusuhut dilo’, i Hajiji kuminaa id Longkod Poiyanan Potimporon (PPK) Selagon id Beaufort montok pinapatahak ponguhupan kumaa nongogompitan liyud i kopohompit 83 paganakan, suai ko’ 56 po paganakan id Lintuhun Mogigiyon Bongawan.
Di doun sodopon, i Boyoon Montiri minooi intong koiyonon pomuwalaian Country Heights om Institut Pongia’an Gaya i noumpadanan nogi’ gama-gama’ tana’ nopuhak.
