Hajiji miampai nangaalap suai id Ramai Kinopoimpuunan Video Muzik “Kita Jaga Sabah” id SICC, Kota Kinabalu, di tadau baino’.
KOTA KINABALU: Video muzik “Kita Jaga Sabah” okon ko’ karya seni nopo, nga’ kopokitanan do rolou ginawo, kolisihan om tonggungan oinsanan rayat Sabah montok manamong pogun diti, ka di Boyoon Montiri, Datuk Seri Haji Hajiji Haji Noor.
Minoboros isio, kinopoimpuunan pinotomod video muzik dilo’ nosili kointalangan do bakat tanak Sabah kaanu momowonsoi karya di poinhali-hali’ i okon nopo ko’ koposompuru mogigiyon, nga nogi’ kopomosik sunduan pisompuruan.
“Soira’ tokou mamarait ‘Kita Jaga Sabah’ (Yati’ Manamong Sabah), ilo’ okon i ko’ slogan nopo tomod. Ilo’ nopo nga’ kapagangatan oinsanan do amu’ momuntuk tinaru, ugama’ toi nindikohon, yati’ oinsanan mositi’ sumaan tonggungan manamong pgoun diti mantad sunduk kotoronongon, pisompuruan om koburuon,” ka disio id Tayangan Perdana Media om Kinopoimpuunan Video Muzik ‘Kita Jaga Sabah’ id Longkod Konvensyen Sompomogunan Sabah (SICC), do hiti, di tadau baino’.
I Hajiji pinopolombus nogi’ kopongunsikohan kumaa poposolimbou, Farish Aziz i nakaanu minonimung bakat ngaawi’ angagayo id pogun diti kaampai i Stacy, Elica Paujin, Feroq, Dabra Sia, Meba, Anip om Nuvel, suai ko’ minonupu’ sinding, Anas Amdan.
Ka disio, piomungan susuminding om ginaras kreatif nokoiyonon dilo’ kopokito do seni kaanu monompuru rayat sabah maya’ pason di kotudu’ do ginawo.
Ka disio, seni om koubasanan nopo wookon karalano’ bobos kiwaya’ montok popiromut mogigiyon, kosuul no komulakan, tu’ kapasaga’ ilo’ diolo’ do popolombus angkab om kalansanan id koyuon di osonong.
“Video muzik diti atalang kopokito do komulakan Sabah okon nopo ko’ kibakat, nga nogi’ kiginawo agayo – mimang yolo’ do komogot pogun diti, mokimokito yolo’ do kosimbanon om orohian do popouhup,” ka disio.
Minamarayou nogi’ i Hajiji kinopongonjuran ababayan Tamu Suara 360 do Kounsol Komulakan Sabah om sokodung Komontirian Komulakan om Spoot, i minanahak kosiwatan kumaa sukod wagu popolombus pomusarahan karait timpu dumontol pogun.
Minanangkabayahan isio kumaa di Presiden Kounsol Komulakan Sabah, Abqaree Abekan om tiim disio mantad inggisaman opinogot pinapaanjur kosiwatan dilo’.
“Tangaanak wagu tokou okon nopo ko’ mongilo, nga opoduli’ do balajaran, kosiwatan pakarajaan, koburuon ikonomi om timpu dumontol pogun diti.
“Iti no sunduan kopomodulianan i maan tokou posunio’ id nayatan sukod wagu,” ka disio.
I Hajiji pinoposotol, monuridong Sabah di otunda’ om kiginaras tumopong okon ko’ inggisaman di asanang, nga’ momoguno kolubukan nogi’ kouhupan oinsanan bohogian.
Kohondot dilo’, ka disio, koporintaan pogun tumilombus manahak kosiwatan om sokodung kumaa inggisaman papagaras komulakan, i potuu id kaganaan seni, koubasanan, sipoot toi ko’ kopongindopuan.
“Miampai sunduan ‘Kita Jaga Sabah’, otumbayaan oku do kaanu tokou mongimbulai songinan pogun i okon nopo ko’ komogot i ikonomi, nga nogi’ opuawang koubasanan, oulud id pisompuruan nogi’ kopotonggoi toinsanan rayat,” ka disio.
Pinokianu nogi’ disio rayat Sabah, kosuul no komulakan, do tumilombus mongigit sunduan ‘Kita Jaga Sabah’ sabaagi impohon koponuridongan pogun.
“Yati’ oinsanan nopo nga’ tutumamong Sabah – mantad momumuruan, komulakan, mogigiyon kampung, gisom no do tongo’ mimparagat seni. Gumura’ tokou oinsanan, insya-Allah, kaanu tokou mogowit pogun diti id timpak kalantaion di lobi kasawat,” ka disio.
