Hajiji, Jahid om naalap suai guminambar miampai tongo’ upisor watas i nokotindapou Pitimungan Tongo’ Upisor Watas Pogun Sabah Ko-28 Toun 2025 id Shangri-La Tanjung Aru Resort (STAR), Kota Kinabalu, di tadau baino.
KOTA KINABALU: Koporintaan pogun maya’ Komontirian Koburuon Labus Kakadayan (KPLB) Sabah pinapahabar kootusan montok popoingkawas rontob pongundait karaja’ Monguhup Upisor Watas Okoro’ kumaa Upisor Watas Okoro’ poinggirot kuasa’ misindikot.
Montiri Koburuon Labus Kakadayan, Datuk Seri Jahid Jahim minoboros, laang dilo’ minaan onuo’ montok mangakun di tonggungan agayo diolo’ sabaagi luguan koupisan id watas okoro’ sompoopori.
Ka disio, sundung kosimbanond iti amu’ kopohompit nunu-nunu ponimbanan gred karaja’, kapanahak ilo’ do pongundait pinotomod kopiongoi di tonggungan agayo i owiton di upisor nongokomoi.
“Yolo’ okon ko’ monguhup nopo nga’ luguan koupisan id watas okoro’ i momuruan kopoindalanan, mongulud koburuon om nosili jambatan id pialatan koporintaan om rayat. Mantad dilo’, pongundait wagu diti apatut montok mongunsikou nindikohon diolo’,” ka disio id boboroson kopogulu kopihondot Pitimungan Tongo’ Upisor Watas Pogun Sabah Ko-28 id Shangri-La Tanjung Aru do hiti, di tadau baino’.
Pitimungan dilo’ pinoimagon di Boyoon Montiri, Datuk Seri Haji Hajiji Haji Noor.
I Jahid otumbayaan do kopongokunan dilo’ kosili pongunsub sunduan kumaa pakakaraja’ koporintaan id nayatan watas okoro’, suai ko’ mongingkawas kokitanan diolo’ id mato mogigiyon nokoiyonon.
Daamot dilo’, pinoposotol isio tonggungan oponsol upisor watas om upisor watas okoro’ sabaagi rulud dingguluonon koporintaan pogun id kapalantaion katatapan Sondikoton Sabah Maju Jaya (SMJ).
“Kopulokison, kinotulidon om komiloon dokoyu ngaawi’ id kopoindalanan tonggungan kapatantu’ kalantaion katatapan koporintaan. Koburuon watas di napalan koowit kumaa kasasanangan rayat,” ka disio pinopointalang.
Ki’uhu “Daerah Maju, Rakyat Sejahtera”, pitimungand iti baino’ nokopotimung tongo’ upisor watas montok mogiboboros kaantaban kopoindalanan, miilang pomusarahan om mogihum kootusan kumaa monginggirot koburuon watas id Sabah.
I Jahid pinapaatag nogi’ mooi do KPLB papaharo Mitingan Kopitamangan Tongo’ Projik id koinsanai watas sokukuri’ insan tikid duo wulan montok papatantu’ tikid projik koburuon opiantangan miampai osorisid om opongo tumanud timpu nakatantu’.
Gisom di wulan Kowalu’ 2025, ka disio, komontirian nakapabalanja’ RM281.26 riong mantad kopoobian koburuon RM326 riong, ilo’ nopo nga’ 86.28 pihatus miampai kogumuan projik do noondo diti id kapambayaran kumaa monobubut.
Pinopolombus isio kotumbayaan do oinsanan projik id siriba’ KPLB aanu momongo tumanud timpu nakatantu’ potilombus dilo’ kapanahak waya’ kumaa rayat labus kakadayan.
Pitimungan Tongo’ Upisor Watas Pogun Sabah Ko-28 diti pikikiro kosili koiyonon oponsol montok monginggirot piuhupan id pialatan tongo’ mananamong watas id kopogorisan tonggungan sompoopori montok kasasanangan rayat.
