Hajiji miampai lansanon PBS, STAR om parti komponen GRS di suai id Konvensyen PBS-STAR 2025 id Lintuhun Hongkod Koisaan KDCA, Penampang di tadau baino’.
PENAMPANG: Sabah kaanu monimban kokitanan sumili songinan pogun di lobi kotunda’, komogot, otoronong om oumolig nung Gabungan Rakyat Sabah (GRS) kotilombus onuan mandat do rayat id Pomilian Agayo Pogun ko-17 (PRN17) obontol, ka di Boyoon Montiri, Datuk Seri Haji Hajiji Haji Noor.
Pinosotol disio, solinaid somok limo toun minomuruan koporintaan pogun, mogisusuai naangayan oponsol nosigampot, kaampai pinonondulian ikonomi pogun om kinopoingkawasan kopoopuan nogi’ asil koporintaan pogun miampai poinggayo.
“Ontok minonowoli tokou pomorintaan pogun di wulan Kosiam 2020, Sabah potoguang koyuon ikonomi bobos araat id sinusuyan kahandaman.
“Nga’, miampai palan osorisid om kinopoindalanan Kataapan Sondikoton Sabah Maju Jaya (SMJ) 1.0, okon nopo ko’ nokopononduli’ tokou dilo’, nga nogi’ nokoposimbuat naangayan ikonomi pogun kuminaa rontob di kopoondos kopio,” ka di Ponorikohon GRS dilo’ ontok pinopoimagon pomupusan Konvensyen PBS-STAR 2025 id Lintuhun Hongkod Koisaan, Kadazan Dusun Caltural Association (KDCA), do hiti di tadau baino’.
Ka di Hajiji, wookon naangayan agayo koporintaan GRS kaampai Kinolobusan Suang Pogun Kasar (KDNK) Sabah di 2024 nokoinsawat kuminaa RM84.3 bilion, nung piadangon di RM83.2 bilion di 2023.
“Nopuhu asil pogun solinaid tolu toun otuntud ilo’ nopo nga’ 2022, 2023 om 2024 somok nokosigampot RM7 bilion, nung piadangon di RM3.59 no di 2020. Rizab koporintaan pogun noondo nokosigampot RM8.6 bilion. Kopoopuan suang pogun om labus i nakalantoi nowit suminuang kuminaa Sabah pointonod 2021 nopo kiginumu’ RM35.38 bilion.
“Koinsanai diti nopo kopokito ikonomi di olidas om kointalangan kogorison nogi’ kinalantaion pomorintaan koporintaan pogun buruanon GRS. Aiso’ isai kaanu mogolim dilo’. Ii no pembangkang i momili’ do mungkodom om mogolim tongo’ kointalangan ngaawi’ diti,” ka disio.
Tumanud di Hajiji, GRS okon nopo ko’ kaanu minomonsoi kinomogoton pogun, nga nogi’ tumopot id kopoindalanan koburuonon kogogonopan, monoibau komosikinan adalaan om papasanang koposion oinsanan rayat.
“Insya-Allah, nung GRS kotilombus onuan mandat id pomilian agayo obontol, potontuon tokou koinsanai palan koburuon di noulud anau popoindalan poinponu’ – mantad kakadayan gisom id poonsokid,” ka disio.
Pinosotol po nogi’ disio do katatapan Sondikoton SMJ okon ko’ dokumen nopo tomod, nga’ iso’ palan kohunung timpu anaru i poinpuli kopotonggoi koburuon tadon tulun, koponguludan asil tana’ om kopulokison pomorintaan.
“Miampai angkab pulitik di agaras, osubuanan di koyuon ikonomi di nokoinsonong nogi’ kaadangon pulitik i pinoburu’ tokou toinsanan pointonod 2020, otumbayaan oku do Sabah kalaang osodu’ kumaa toguang sabaagi di otunda’, otoronong om koburu’,” ka disio.
Hajiji pinoposorouo nogi’ do koinsanai lansanon om puru GRS do tumilombus momusus i poburuon piomungan dilo’ id koponoguangan kaantaban timpu dumontol, totondos pembangkang nogi’ laang ngaawi’ pointirung i kituduan popolomog ginaras pulitik GRS.
Ka disio, kinalantaion pomorintaan GRS nokoowit do pembangkang amu’ ounsikou om potitilombus mimpomonsoi kapanangadan pulitik i kikoyuon monginraat, kaampai kapatayadan boros oudut, kapangakalan om totondos kumaa koporintaan nogi’ tongo’ lansanon ngaawi’ dau.
“Amu’ yolo’ tumingkod. Momiwogu om osolon yolo’ di kinalantaion nosigampot dati’. Manu yolo’ do kokito dati’ opiil, olomog om aatu’.
“Kohondot dilo’, posorohon ku, walai tokou, yati’ manamong. GRS diti walai tokou, koiyonon tokou do tumirung om mongulud ninggisaman.
“Nung okon ko’ yati’ manamong dilo’, isai podii i aanu tokou do posondihan,” ka disio.
Daamot dilo’, komoyon disio Konvensyen PBS-STAR 2025 sabaagi iso’ timpu kisusuyan kahandmaan i koponginggirot piupakatan pulitik nokoiyonon, potilombus dino kapanahak tanda’ atalang do GRS posodia’ monoguang PRN17 miampai nuludan kopomuruanan di ogirot, osompuru om kitonggungan.
Ka disio, piuhupan ogirot pialatan duo parti nokoiyonon – Parti Bersatu Sabah om Parti Solidariti Tanah Airku (STAR) – nopo nga’ kokitanan kinosukodon pulitik i pinopo’iliu koponsolon rayat om pogun Sabah posoibau ko’ mantad pisuayan tinonudan.
“Konvensyen diti okon nopo ko’ kopokito sunduan pisompuruan id nayatan parti nokoiyonon i kiharo susuyan kahandaman om prinsip poinpoopori, nga kopokito nogi’ do GRS kaanu lumaan lobi kosodu’ sabaagi piomungan pulitik i otootopot mongobi’ angkab rayat Sabah,” ka disio.
