Joniston Bangkuai
PENAMPANG: Luguan Kopointalangan Parti Bersatu Sabah (PBS), Datuk Joniston Bangkuai minoboros, slogan “Rumah Kita, Kita Jaga (Walai Tokou, Yati’ Manamong)” nopo nga’ kapagangatan patriotik kumaa rayat Sabah montok maganu tonggungan kumaa pogun sondiri’, om okon i ko’ iso’ kokitanan kasahapan kumaa koporintaan Pisompuruan.
Minoboros i Konvensyen Miampai PBS om Parti Solidariti Tanah Airku (STAR) di kumoinsan id Lintuhun Hongkod Koisaan do hiti di tadau baino’, pinointalang di Joniston do slogan dilo’ kopokito kogos poinpoopori i aralom id nayatan rayat Sabah om pogun diolo’, kopiongoi di sunduan pisompuruan, tonggungan om kaandasan i poinsuang id loyou pogun.
Pinosotol disio, slogan Gabungan Rakyat Sabah (GRS) dilo’ pinili’ montok poposikit sunduan kosongonuan nokoiyonon id kopotontuan timpu dumontol Sabah, nogi’ popoimagon koponsolon popogoris kopomuruanan om kuasa’ momonsoi kootusan di tongo’ parti mantad Sabah.
Suminuku’ di roiton loyou pogun miagal “Sabah tanah airku, negeri kita yang tercinta” (Sabah pogun ku, pogun tokou di koupusan) om “Sabah negeri merdeka” (Sabah pogun momorinta’ sondiri), ka disio, slogan dilo’ kopiongoi di kopokionuan mooi do rayat Sabah misompuru om mongumolig pogun diolo’ miampai poinponu’ tinopot.
“Slogan diti okon kopio ko’ magada’ (anti) Pisompuruan tu’ Sabah pointatap tumopot kumaa Malaysia. Nga’ manu tokou do tompuanon sabaagi tambalut ponokikungsi di miadas, hinombo rolou tokou onuan kopomodulianan id kapamalanan katatapan pogun.
“Kootusan karait infrastruktur, balajaran om koburuon mositi’ kopokito koyuon otopot do hiti, okon i ko’ potontuon do bohogian id Putrajaya i pikikiro doti’ do amu karati poinponu’ di kaantaban poinpoopori i potoguang tokou,” ka disio.
Binala’ po nogi’ disio kootusan i winonsoi miampai aiso’ pinibarasan miampai koporintaan pogun Sabah, kaampai pinonuridongan Puruankuasa’ Komogoton Desa Madani (JKDM) om kinapahabaran Pisompuruan akrait koburuon miampai do tumau om gas id kowoigan Ambalat.
Nokunan di Joniston kinopoingkawasan Geran Pinotomod Sabah mantad RM53 riong kuminaa RM600 riong nopo nga’ laang di osonong, nga’ pointatap pinoposotol do kopokionuan GRS mooi do 40 pihatus asil i nosili kopotutan Sabah miagal poinsuang id Koundangan Pisompuruan pogulion.
Minagada’ totondos do slogan dilo’ ‘retorik’ pulitik nopo, ka di Joniston: “Walai Tokou, Yati’ Manamong” nuru’ rotion sabaagi kopokionuan otopot om monugat montok koponompuanan di aadas, tonggungan toinsanan om pamantangan ouli’ kohondot kopotutan Sabah papatantu’ sondikoton dau sondiri’ id Pisompuruan Malaysia.
“Otumbayaan oku nung konsep diti poindalanon do poinponu’, kaanu ilo’ mongimbulai piormutan di lobi koulud id pialatan koporintaan Sabah om koporintaan Pisompuruan, nogi’ kopongidu’ koinsanai pomumusarahna poinraat kumaa kinotulidon do mokimokito Sabah komogot miadang do Semenanjung Malaysia.
“Monumboyo’ kopotutan di poinpatut no do pasanganu Sabah kosili laang agayo kumaa koponuridongan songinan Malaysia di oulud, osompuru om agaras,” ka disio.
