Hajiji minonorikohon Mitingan Pasca Kabinet Koupisan Boyoon Montiri.
KOTA KINABALU: Boyoon Montiri, Datuk Seri Haji Hajiji Haji Noor, lumansan pakakaraja’ koporintaan tumilombus popoudong prinsip kabaalon, amu’ tumonggoi om tinonggungan id kopoindalanan karaja’ do po’ompus toun pomilian agayo diti.
“Tumoguang tokou Pomilian Agayo Pogun toun diti. Sabaagi toruntud pomorintaan koporintaan pogun, kukumaraja’ koporintaan mositi’ papatantu’ koinsanai pitorinaan kopoindalanan om kapatahakan surupukaraja’ kumaa rayat amu’ ohimpogongan om kotilombus poindalanon oturundus miagal toririmo.
“Kopulokison om kinotulidon pakakaraja’ koporintaan id koponoguangan timpu di agayo pongumbalan diti kopokito tonggungan tokou montok tumilombus monokodung sistem demokrasi om kaadangon pomorintaan pogun,” ka disio.
Minoboros id Mitingan Pasca Kabinet Koupisan Boyoon Montiri id Menara Kinabalu di tadau baino, i Hajiji minongunsub nogi’ oinsanan luguan koupisan popokito tonggungan akawas id kopoindalanan karaja’ diolo’.
Ka disio, nuru’ yolo’ popoindalan karaja’ miampai lobi kosikap om kohunung, nogi’ miontong projik miampai lobi kiwaya’ montok papatantu’ oinsanan projik di pinolulus aanu momongo tumanud timpu nakatantu’.
“Iti oponsol montok mongilag koinloidan kopoindalanan, kopomirubatan intodonon, nogi’ koponginraag kokitanan om kotumbayaan rayat kumaa ginoris pakakaraja’ kopoindalanan koporintaan,” ka disio.
Boyoon Montiri pinoposorou nogi’ oinsanan pakakaraja’ koporintaan mooi do toririmo obinsimbar, osikap om popoindalan karaja’ di osonong id kopoindalanan tonggungan montok manahak surupukaraja’ bobos osonong kumaa rayat.
“Pakakaraja’ koporintaan kiguno popoindalan karaja’ pinatahak miampai poinponu’ginawo, kinotulidon om tinonggungan di akawas. Nuru’ nogi’ diolo’ mongilag nunu-nunu pigogutan koundaran mooi sondikoton om tuduan koporintaan pogun aanu monigampot poinlantoi.
“Koundaran koporintaan mositi’ no toririmo posuulon ko’ mantad koponsolon sondiri,” ka disio.
Hajiji pinopsorou nogi’ pakakaraja’ koporintaan mooi do toririmo manamong tinonggungan sondiri’ om poposili dilo’ sabaagi poimpahan id koponuridongan kinoulunon.
“Nung aiso’ tinonggungan kinoulunon di akawas, waya’ dilo’ kumaa kokitanan pakakaraja’ koporintaan om oinsanan kotinanan koporintaan pogun kosili araat kopio,” ka disio pinoposotol.
Id haal suai, pinopoilo i Hajiji do apat rang undang-undang maan pawalado’ id Pitimungan Lintuhun Undangan Pogun solinaid duo tadau i kotimpuun tadau Koiso’ obontol.
Koupisan Boyoon Montiri papawalad duo rang undang-undang ilo’ nopo nga’ Rang Undang-Undang Kotolunan (Ponimbanan 2025) om Rang Undang-Undang Tadbir Urus Iklim om Karbon 2025.
Duo po kawagu rang undang-undang maan pawalado’ do Komontirian Kousinan ilo’ nopo nga’ Rang Undang-Undang Sukai Dagangan Pogun (Ponimbanan 2025) om Rang Undang-Undang Perbekalan Tambahan 2025.
