Hajiji suminasi’ kinapatahakan ponokotanda’ kunci SDCC mantad di Abdul Gapar (wanan) kuminaa di Safar (gibang).
KOTA KINABALU: Boyoon Montiri, Datuk Seri Haji Hajiji Haji Noor, pinopoimpuun Longkod Panamangan Kadaaton Pogun (SDCC), i po nogi’ longkod kumoiso’ miagal dilo’ id Malaysia om sinakadai poinponu’ do Agensi Ponguludan Kadaaton Negara (NADMA).
“Tinuridong miampai miniuhup do Puruankuasa’ Ponguludan Kadaat Pogun om NADMA, SDCC papatantu’ laang di lobi kosikap om oulud nung aantakan kadaaton,” ka di Hajiji ontok pinopoimagon kinopongukaban SDCC id Menara Kinabalu, di tadau baino’.
Poinsumpak id Aras 4, Blok A Menara Kinabalu, SDCC kitonggungan sabaagi koiyonon misompuru montok mongulud laang kotinanan koumoligan om manampasi, NGO nogi’ tinan ponolidikan ontok aantakan kadaat.
SDCC noinggonopan do tiknologi kointalangan om piromutan kaawagu, kaampai sistem pitimbungakan video nogi’ pangkalan data poinpuli montok ponimungan om koponorisidan kointalangan kopohompit kadaat.
Longkod kigatang RM750,000 dilo’ mianganu timpu walu’ wulan montok minomongo.
Nokotindapou nogi’ i Montiri Sains, Tiknologi om Inovasi, Datuk Dr. Mohd. Arifin Mohd. Arif; Kumoduo Luguan Potunud NADMA, Datuk Dr. Abdul Gapar Abu Bakar; Monunurat Koporintaan Pogun, Datuk Seri Sr. Safar Untong; Pesuruhjaya Pulis Sabah, Datuk Jauteh Dikun; Monunurat Haal Suang Pogun om Ponolidikan Pogun po nogi’ sekretariat Puruankuasa’ Ponguludan Kadaat Pogun, Datuk Ag. Shahminan Ag. Shahari om i Potunud Tinimungan Koumoligan Awam Malaysia (APM) Sabah, Mohd. Yusoff Samad.
